Кран выратавальнікаў падыме 25 тон

Кран не пажарны, будаўнічы, з тэлескапічнай стралой. Устаноўлены на базе аўтамабіля МАЗ. Базавае шасі платформы МАЗа - на трох колавых восях. Адна спераду, дзве - ззаду, расказаў у інтэрв'ю “РГ” намеснік па тыле начальніка гаррайаддзела па надзвычайных сітуацыях Уладзімір Лях.

Паводле яго слоў, кран куды больш магутны за аналагічную будаўнічую тэхніку. Грузападымальнасць двухвосевых тэлескапічных кранаў - 10-15 тон. Месца стаянкі новай машыны - гараж пажарнай аварыйна-выратавальнай часці №5, што ў мікрараёне Парашкі.

Уладзімір Лях паведаміў таксама: падарунак калегіі МНС каштуе 426 мільёнаў 846 тысяч 120 рублёў. Аплачаны ён са сродкаў рэспубліканскага бюджэту. Маладзечанскія выратавальнікі атрымалі кран за добрыя паказчыкі ў рабоце. Дагэтуль у гаррайаддзела не было свайго крана, а пры той разнастайнасці работ, якія выконваюць супрацоўнікі аддзела па надзвычайных сітуацыях, ён неабходны.

Кран будзе задзейнічаны для разбору будынкаў, падчас аварыяў на будоўлі, для ліквідацыі наступстваў дарожна-транспартных здарэнняў. Калі спатрэбіцца, дапамогуць выратавальнікі гэтай тэхнікай прамысловым, будаўнічым і сельскагаспадарчым прадпрыемствам і арганізацыям горада і раёна, сказаў Уладзімір Лях.

Сяргей ЗЯНЬКО.