Любімы спектакль Рахмангулавай

Артыстка Мінскага абласнога драматычнага тэатра Алена Рахмангулава напрыканцы снежня адзначыла юбілей.

Гледачы, мяркуючы па іх рэакцыі, найбольш упадабалі “Вечар”. Гэта – любімы спектакль Алены Рахмангулавай. Хаця праца над роллю Ганны ў ім нялёгка далася артыстцы: спектакль ставілі сем гадоў таму, Алене Рахмангулавай тады было крыху за 30, яе гераіні – 80. “Я і сваю бабулю ўспамінала, і пад царквой за бабкамі сачыла – трэба ж перадаць уласцівыя старой жанчыне жэсты, паходку, цяжар у нагах. Мне было вельмі цяжка, я нават думала, што ўжо прафесійна непрыгодная. Урэшце атрымалася – гледачы не верылі, што гэта я на сцэне. Гаварылі: “Дзіўна, жанчына старая, а рукі такія маладыя”. Так што і гэтай роллю, і спектаклем я даражу”, – расказала яна ў інтэрв’ю “РГ”.

Адзінае, пра што Алена Рахмангулава крыху шкадуе, – што на “Вечар” часта прыходзяць гледачы вельмі маладыя, непадрыхтаваныя: гэтая п’еса Дударава ўключаная ў праграму па беларускай літаратуры для восьмага класа. І далёка не ўсе школьнікі добра разумеюць, што адбываецца паміж трыма старымі людзьмі на сцэне, успрымаюць не так, як дарослы глядач, шумяць. “Вядома ж, школьнікі не бяздушныя істоты, і душы ў іх не чэрствыя. Праз нейкі час настрояцца і слухаюць, але ж пакуль яны супакояцца… Нам з калегамі нават крыху крыўдна бывала”, – падзялілася Алена Рахмангулава.

Юбілеі артыстаў у Мінскім абласным драматычным тэатры традыцыйна адзначаюць бенефісамі. Летась праходзілі спектаклі ў гонар Барыса Доніна, Сяргея Карзея і Эміліі Ларыёнавай.

Святлана ЦІШКО.