Мужчына 35-40 гадоў зайшоў у краму, быў нейкі час паміж вітрынамі, потым узяў дзве бутэлькі гарэлкі і накіраваўся ў бок касы. Аднак, падышоўшы да касы, мужчына заўважыў, што тая размешчана прама ля ўваходу ў гандлёвую залу, турнікет трохі прыадкрыты, а ўслед за ім выхад з крамы.

Ён, мабыць, вырашыў скарыстацца магчымасцю, бо ля касы трохі змяніў кірунак, шмыгнуў у шчыліну турнікета і знік на вуліцы. Практычна адразу за ім выбегла прадавец, але нікога не знайшла.

На шчасце, магазін быў абсталяваны камерамі відэаназірання. Аператыўнікі здагадаліся, што мужчына мог быць не адзін. Першапачатковыя аператыўна-вышуковыя мерапрыемствы не далі вынікаў, таму Вырашылі звярнуцца па дапамогу да СМІ. Пасля выхаду інфармацыі ў СМІ ў міліцыю паступіла некалькі званкоў ад грамадзян, якія пазналі ў падазраваным жыхара Мядзельскага раёна. Ну а далей, як кажуць, справа тэхнікі. У хуткім часе мужчыну і двух ягоных меркаваных знаёмых знайшлі.

Як аказалася, у той дзень двое жыхароў Мядзельскага раёна вырашылі з’ездзіць па справах у Маладзечна. Яны прапанавалі з імі паехаць і свайму знаёмаму, які стаў пасля “героем” відэасюжэту. Бліжэй да вечара, вяртаючыся дадому, мужчыны заехалі ў краму.

Першыя двое ўжо паспелі выбраць неабходныя тавары, аплацілі іх і пайшлі чакаць свайго таварыша ў машыне. Праз некаторы час ён падсеў да іх і, не чакаючы ніякага падвоху з яго боку, прыяцелі паехалі дадому. А праз некалькі дзён даведаліся ад міліцыянераў, што “дзякуючы” свайму знаёмаму яны падазраюцца ў дачыненні да крадзяжу.

Сам “герой” сюжэту ў свае 35 гадоў мае за плячыма ўжо некалькі судзімасцяў, у тым ліку за крадзяж, хуліганства і рабаванне. Цяпер жыве ў адным з пасёлкаў Мядзельскага раёна, нідзе не працуе.

Па факце рабавання ўзбуджаная крымінальная справа, падазраваны затрыманы.

УУС Мінскага аблвыканкама дзякуе неабыякавым грамадзянам, якія дапамаглі знайсці падазраванага.