Ці лёгка праявіць сябе валанцёрам у сацыяльных установах Маладзечна, Вілейкі, Валожына?
Ахвотныя распрабаваць сябе ў добрай справе гутарылі з кіраўнікамі сацыяльна-педагагічных цэнтраў, школы-інтэрната, тэрытарыяльнага цэнтра абслугоўвання насельніцтва, псіханеўралагічнага дома-інтэрната. Адказы крыху адрозніваліся адзін ад аднаго, але сэнс быў прыкладна аднолькавы: прыходзьце, валанцёрам мы заўсёды рады.
Жаданне, любоў да дзяцей і… медыцынская даведка
У сацыяльна-педагагічным цэнтры ў Шылавічах на Вілейшчыне можна прыйсці пагуляць з дзецьмі. Акрамя вашага гарачага жадання і добрага сэрца, патрэбная яшчэ медыцынская даведка аб тым, што вы не маеце захворванняў, якія перашкаджаюць вам мець зносіны з дзецьмі. І вядома, узгадніце свой прыезд з кіраўніцтвам.
У Радашкавіцкай школе-інтэрнаце валанцёраў заўсёды шмат. Наведванне выхаванцаў распісана ўжо да сакавіка. А вось вясной можна дамовіцца з дырэктарам і наведаць школу.
У Маладзечне з задавальненнем адгукнуцца на канцэрт і чаяванне
Маюць практыку работы з валанцёрамі і ў маладзечанскім псіханеўралагічным доме-інтэрнаце. Праўда, добрыя справы тут часцей праходзяць у фармаце канцэртаў да пэўных дат, напрыклад, да Дня інвалідаў або сумесных чаяванняў. Сваё наведванне і фармат мерапрыемства валанцёрам варта ўзгадніць з культарганізатарам.
Валанцёрскія прапановы памыць падлогу або працерці пыл ні ў Маладзечне, ні ў Радашкавічах не задаволілі. Адказалі, што гэтым займаецца тэхнічны персанал. Дапамога ім непатрэбная, бо і самі добра спраўляюцца.
Хочаце фізічнай працы ці здольныя зладзіць майстар-клас? Едзьце ў Валожын
А вось у тэрытарыяльным цэнтры абслугоўвання насельніцтва ў Валожыне працы хопіць усім, у тым ліку і фізічнай. Тут робяць вялікі рамонт у Цэнтры дзённага наведвання для інвалідаў. У лютым рамонт плануюць скончыць. Трэба будзе шмат чысціць, мыць, карацей, рабіць памяшканне чыстым і ўтульным для наведнікаў. Таму валанцёрскія рукі тут лішнімі не будуць.
Калі ж навядуць чысціню, то адміністрацыя гатовая прыняць валанцёраў нават у якасці выкладчыкаў. «Калі вы нешта ўмееце рабіць рукамі і гатовыя навучыць гэтаму нас, мы з задавальненнем павучымся», – адказалі тут.
Як бачыце, рабіць добрыя справы проста. Ва ўсялякім разе, кіраўнікі сацыяльных устаноў рэгіёна ваша жаданне гатовыя падтрымаць.
Даведка «РГ»
Валанцёрства (ад лацінскага – добраахвотны) – шырокае кола дзейнасці, якое ўключае традыцыйныя формы ўзаемадапамогі і самадапамогі, афіцыйную прапанову паслуг, якія ажыццяўляюцца добраахвотна на карысць грамадскасці без разліку на грашовую ўзнагароду. Першапачаткова валанцёрамі называлі выключна салдатдабравольцаў у Італіі, Францыі, Англіі і Германіі падчас 80-гадовай і 30-гадовай войнаў. Салдат запрашалі ваяваць толькі за славу і вайсковую здабычу. Многім гэтага было дастаткова.
У СССР слова «валанцёр» ужывалі рэдка, аддаючы перавагу слову «добраахвотнік». Запыт на валанцёрскую дзейнасць у сучасным яе разуменні сфарміраваўся бліжэй да 2000-х.
• Текст доступен на языке: Русский
