Фота Нашай Нівы.

У Херсонскай вобласці Украіны дзесяцігадовы хлопчык пакончыў з сабой. Пра гэта паведамляе УНІАН.

Аператыўна-следчая група слядоў гвалтоўнай смерці не выявіла. Эксперты заключылі, што дзіця памерла з прычыны механічнай асфіксіі.

Як распавёў прадстаўнік паліцыі вобласці Яраслаў Шанько, сям’я на ўліку ў сацыяльных службаў не знаходзілася, хлопчык характарызаваўся толькі станоўча. Таксама праваахоўнікам стала вядома, што незадоўга да няшчаснага выпадку ў хлопчыка адбыўся канфлікт з маці, якая адмовілася купляць яму новую камп’ютарную гульню.

Жанчына распавяла, што паабяцала купіць яе пазней, пасля чаго сын пайшоў у свой пакой. Калі яна зайшла туды, то выявіла сына ўжо мёртвым.