Фота Бенуа Тэсьер для Reuters.

На сайце Petitions.by збіраюць подпісы пад зваротам за ўвядзенне каранціну ва ўсіх навучальных установах Беларусі ў сувязі з пандэміяй каранавірусу. На момант публікацыі — за 14 гадзін — сабралі ўжо звыш 2200 подпісаў.

Зварот збіраюцца накіраваць у Міністэрствы адукацыі і здароўя праз два дні.

У петыцыі патрабуюць:

  • перавесці ўсе навучальныя ўстановы на дыстанцыйную адукацыю да заканчэння неспрыяльнай эпідэміялягічнай сітуацыі ў Еўропе
  • забараніць усе масавыя сходы ў навучальных установах
  • абавязкова правяраць на COVID-19 усіх студэнтаў, якія прыяжджаюць з-за мяжы, а таксама іх аднагрупнікаў
  • для студэнтаў, якія прыбылі з краін з успышкамі новага каранавірусу, рабіць абавязковы 14-дзённы каранцін;
  • рэгулярна дэзінфікаваць інтэрнаты, дзе жывуць навучэнцы;
  • забяспечыць інтэрнаты сродкамі гігіены і дэзінфэкцыі за кошт бюджэту;
  • рабіць дадатковыя захады для абароны сталых, якія цяпер па-ранейшаму наведваюць месцы, дзе масава збіраюцца людзі -крамы, рынкі, паліклінікі і грамадзкі транспарт.  Бо сталыя людзі – асабліва ўразлівыя да COVID-19.

Аўтар петыцыі адзначае, што падобныя захады ўжо прынялі ў суседніх Польшчы і Украіне, а таксама заўважае, што эпідэмію COVID-19 называюць непазбежнай — пытанне толькі ў маштабах.

«Менавіта забарона на наведванне месцаў масавага збору людзей выратавала Кітай ад катастрофы і краху эканомікі», — сцвярджаюць у петыцыі.

• Текст доступен на языке: Русский