Нядзеля ў Мінску зноў стала днём масавага затрымання палітычных праціўнікаў Аляксандра Лукашэнкі, піша Наша Ніва.

У суботу, 7 лістапада, затрымалі яшчэ 116. У прыватнасці, каля 1-й клінічнай бальніцы затрымалі 60 медыкаў.

Сярод затрыманых у нядзелю — нямала зорак.

Проста з машыны выцягнулі прызёра Алімпійскіх гульняў, лёгкаатлета-дзесяціборца Андрэя Краўчанку. Разам з ім схапілі вядомага кікбаксёра Івана Ганіна.

І Краўчанка, і Ганін бралі актыўны ўдзел у Свабодным аб’яднанні спартоўцаў.

На плошчы Свабоды была затрыманая Міс Беларусь 2008 года Вольга Хіжынкова.

У спісах затрыманых знайшоўся і 56-гадовы акцёр Аляксандр Ждановіч, вядомы ўсім беларускім дзецям як Маляваныч, вядоўца «Калыханкі».

Быў затрыманы і Аляксандр Жлутка, адзіны на Беларусь спецыяліст па сераднявечнай лаціне, 66-гадовы кандыдат філалагічных навук, які працуе ў Інстытуце гісторыі Акадэміі навук.

 

 

• Текст доступен на языке: Русский