Скрын з відэа.

У Варшаве – снегапады, ад гэтага ўскладнены рух. Адзін з аўтобусаў забуксаваў. У гэты момант здымачная група тэлеканала TVN24 падышла да пасажыраў аўтобуса для інтэрв’ю.

Пагутарыўшы з жанчынай, вядучы заўважыў, што нейкі мужчына ў адзіночку штурхае аўтобус. Аўтобус не мог працягнуць рух на вузкай вуліцы, ззаду яго сабраўся затор. На відэа бачна, як да аўтобуса падыходзіць мужчына і моўчкі пачынае яго штурхаць.

– Бачу, адзін чалавек спрабуе штурхаць гэты аўтобус, як на плакатах з 1980-х, – кажа вядучы і падыходзіць да мужчыны.

Вядучы пачынае дапамагаць штурхаць аўтобус, але пры гэтым спрабуе завязаць размову.

– Штурхнуць можна легкавы аўтамабіль, але з аўтобусам … нават не ведаю, – сказаў вядучы. – А вы спяшаецеся дадому?

– Я не мувлю па-польску, – адказаў мужчына.

– Адкуль вы?

– З Беларусі. Давай разам. Можа, папросіш хлопцаў з аўтамабіляў, каб дапамаглі?

– Не, напэўна занадта вялікі аўтобус.

– Але там усё роўна затор. У Расіі штурхалі самалёт.

– У Беларусі часта захрасаюць аўтобусы? Нічога сабе, мы яго штурхнулі!

Падчас гэтых слоў аўтобус сапраўды ўдалося зрушыць, Ён паехаў наперад

– Усё, дзякуй, да пабачэння, – сказаў беларус.

– Дзякуй, да пабачэння, але гэта незвычайна, вы трэніруецеся?

– Я не разумею.

– Трэніроўка была?

– Усяго найлепшага, да пабачэння.

Пасля гэтага мужчына пайшоў.