Ілюстрацыйнае фота nikhospital.ru

Вакцынацыя ад каронавіруса ў Беларусі пачалася 29 снежня мінулага года. Пакуль прышчапляюць медыкаў. 

Кіраўнік Міністэрства аховы здароўя Дзмітры Піневіч у эфіры Беларусь 1 паведаміў, што 9 лютага ў краіну паступіла 40 тысяч вакцын, у пачатку сакавіка чакаецца яшчэ 100 тысяч, паведамляе Tut.by.

У пачатку сакавіка пачнуць прывіваць педагогаў, работнікаў гандлю — тых, у каго шмат кантактаў з людзьмі.

— У канцы сакавіка мы плануем масавы выхад вакцыны айчыннай вытворчасці разам з нашымі расійскімі калегамі. Тады мы ўжо пачнем прывіваць ўсе катэгорыі насельніцтва: тых, хто выкажа жаданне і ў каго не будзе супрацьпаказанняў, — сказаў Піневіч.

Раней кіраўнік Міністэрства аховы здароўя паведамляў, што за студзень, люты, сакавік і красавік планавалі вакцынаваць 1,2 мільёна людзей, а затым выйсці на паказчык у 5—5,5 мільёна прышчэпленых ад каранавіруснай інфекцыі.

Што тычыцца вытворчасці расійскай вакцыны ў Беларусі, то для гэтых мэтаў будуць задзейнічаныя дзве пляцоўкі «Белмедпрэпаратаў» у Мінску і магутнасці віцебскага прадпрыемства «БелВітуніфарм».

• Текст доступен на языке: Русский