Вось ўжо на парозе самыя добрыя, цёплыя і сямейныя святы. Кожная сям’я стараецца падрыхтаваць святочны стол.

А ён павінны быць шыкоўным, каб запоўніўся на ўвесь год і стаў сімвалам дабрабыту і багацця на цэлы год.

Прапаную вам, паважаныя чытачы, рэцэпты і да каляднага стала, і да навагодняга.

Не скупіцеся перад святамі, купіце трохі прадуктаў для дарагіх страў, і адчуйце сябе багатымі. Гэта парадуе вас і прыцягне грошы.
Вельмі прыгожа на стале выглядае такая нескладаная страва, як

“калядны вянок”

Памідоры круглыя і слівападобныя розных памераў 3-4 сартоў, базілік, дробныя шарыкі мацарэлы, можна зярнёны тварог, зялёны соус песта.

Для запраўкі: 3 ст. лыжкі аліўкавага алею, 1 ст. лыжка бальзамічнага воцату, соль і чорны молаты перац – на смак.

Базілік і памідоры вымыйце і абсушыце. Тыя памідоры, што большыя, нарэжце кружочкамі, слівападобныя – удоўж і папалам. Выкладзіце на вялікую талерку ў выглядзе вянка. Зверху пакладзіце маленькія цэлыя.

Зярнёны тварог прамыйце ў сіце праточнай вадой, дайце сцячы. Выкладзіце зверху на таматы, напрыклад, у чатырох месцах. Гэта на выпадак, калі не ўдалося знайсці мацарэлу.

Змяшайце алей з бальзамічным воцатам, прыпраўце соллю і перцам, паліце “вянок”. Зверху размяркуйце соус песта і лісточкі базіліку.

Сёлета на стале на Новы год павінна быць трусяціна, бо Змяя надта любіць зайцоў і трусоў. З яе можна прыгатаваць страву “Стыфада”. Важна, калі купіце труса незамарожаным, яго трэба замарозіць, а потым размарозіць, тады мяса стане далікатным.

“Стыфада”

Для прыгатавання стравы вам спатрэбіцца 1 кг трусяціны, 1 кг маленькіх цыбулін, 800 г памідораў, 5 зубкоў часнаку, 8 ст.л. аліўкавага алею, 2 лыжкі воцату, соль, чорны перац, молаты і цэлы, 2 лаўровыя лісцікі, 0,5 ст.лыжкі молатай каляндры, 2 палоскі карыцы, 1 апельсін.

Мяса нарэжце на вялікія кавалкі, дадайце спасераваныя памідоры, разрэзаны на 4 часткі апельсін, алей, соль, перац, воцат, усе спецыі і тушыце пад шчыльна закрытай накрыўкай на невялікім агні. Прыкладна праз гадзіну дадайце ачышчаныя цыбулінкі і зноў тушыце каля гадзіны. Затым з гатовай стравы дастаньце гарошынкі перцу, лаўровы ліст і карыцу і падавайце, паклаўшы з аднаго боку мяса, а з другога – цыбульку. Нарэшце ўпрыгожце “Стыфада” “кветкай” з разрэзанага апельсіна. Падыдзе да яго і гарнір з бульбы.

Вэнджаны вугар

А аматарам раскошы і далікатэсаў можна купіць вэнджанага вугра, скруціць змяіным кальцом, надрэзаць на кавалачкі і пакласці на сярэбраны паднос, які будзе ўвасабляць возера. А вакол раскласці тарталеткі-лодачкі з маслам і ікрой, якія быццам бы плывуць да вугра. 

Салата “Змяя”

Тры бульбіны, тры плаўленыя сыркі, 3 яйкі, 150 г маянэзу, 2 бляшаначкі кансерваванай гарбушы і масліны, карнішоны – для ўпрыгожвання.
Бульбу зварыце ў лупінах, астудзіце і надзярыце на буйной тарцы.

Яйкі зварыце ўкрутую і аддзяліце бялкі ад жаўткоў. Бялкі і плаўлены сыр надзярыце на буйной тарцы. Змяшайце бульбу, сыр, бялкі і маянэз.

З гарбушы зліце вадкасць і разамніце відэльцам.

На стол пакладзіце харчовую плёнку і выкладзіце на яе масу з бульбы, сыру і бялкоў. Разраўняйце у пласт таўшчынёй 0,7-10 мм і шырынёй 10-12 см. На сярэдзіну такога палатна выкладзіце рыбную масу. Затым пры дапамозе плёнкі злучыце краі так, каб гарбуша апынулася ўнутры (як начынка). Не разгортваючы плёнку, надайце рулету “змяінуюю” форму. Для гэтага спачатку сфармуйце галаву, а затым – кончык хваста.

Вазьміце талерку і пакладзіце на яе S-падобна змяю швом плёнкі ўніз. Як будзеце класці, акуратна здымайце і плёнку. Затым падпраўце ўсе агрэхі формы.

Нарэжце масліны і карнішошы тонкімі кружочкамі і выкладзіце з іх луску.

З бялку выражце два аднолькавыя скрылікі авальнай формы, а масліны разрэжце папалам, пакладзіце на скрылікі бялку і зрабіце вочкі.

Рулет са свініны з яблыкамі

Так можна выкласці закускі – сыр, кілбасу, гародніну.

1 кг філе свініны, 1 цыбуліна, 2 яблыкі, цэдра паловы лімона, соль, спецыі – на смак.

Разагрэйце духоўку да 250 градусаў.

Дробна нарэжце цыбулю. З яблыкаў абярыце скурку і нарэжце іх. Абсмажце разам на алеі да мяккасці. Дадайце цэдру.

Мяса распластайце (можна адбіць), пасаліце і паперчыце з двух бакоў. Выкладзіце начынку, скруціце і перавяжыце ніткамі ці закаліце зубачысткамі.

Пастаўце запякацца на 20 хвілін, затым паменшыце тэмпературу да 160 градусаў і запякайце яшчэ хвілін 40.

Рэцэпты ад дызайнера адзення маладзечанкі Людмілы Хрол:

Фарэль па-карлаварску

Філе фарэлі – 4 штукі па 160-180 г, соль і перац – на смак, 8 ч. лыжак  здробненых міндальных арэхаў, сок паловы лімона, аліўкавы алей.

Рыбу вымыйце, абсушыце папяровым ручніком, папырскайце лімонным сокам, паперчыце, пасаліце.

Здрабніце арэхі і ўкачайце рыбу ў арэхі. Абсмажце на аліўкавым алеі, 5 хвілін з кожнага боку. Можна да арэхаў дадаць надзёрты на сярэдняй тарцы сыр. Падавайце з запечанымі памідорамі, перцам. Упрыгожце пятрушкай.

Кабачковыя пірамідкі

Невялікі кабачок, 100 г сыру, 4 ст. лыжкі з верхам мукі, яйка+3 вараныя жаўткі, 3-4 зубкі часнаку, 1 ст. лыжка смятаны, маянэз, шчопця соды, зяленіва пятрушкі, стручок чырвонага перцу, соль.

Кабачок надзярыце на буйной тарцы ў дуршляк, пасаліце і пакіньце на 5 хвілін, каб выдзеліўся сок. Затым адцісніце, перакладзіце ў глыбокую пасудзіну. Убіце яйка, дадайце смятану, соду, пагашаную воцатам, здробнены часнок і муку і перамяшайце. З атрыманай масы спячыце блінчыкі, формачкай ці чарачкай выражце кружкі.

Кожны змазвайце сумессю надзёртага на сярэдняй тарцы сыру, здробненага часнаку і маянэзу. Складзіце адзін на адзін па некалькі штук. Краі змажце маянэзам і пасыпце дробна нарэзанай пятрушкай. Зверху пасыпце цёртым жаўтком, упрыгожце кружочкамі салодкага перцу.

Проста МАРЫЯ.

Фота velvet.by.