У адным з садкоў Маладзечна ў канцы студзеня хтосьці з бацькоў паскардзіўся ў аддзел адукацыі на няню.

– Нібы наша няня Віка крыўдзіць дзяцей. Ды чаго толькі не сказалі! – распавядае мама аднаго з выхаванцаў гэтай няні. – Нас склікалі на бацькоўскі сход. Мы ўсе ў шоку! Ні ў кога ніколі не было заўваг ні да няні, ні да выхавальнікаў. Дзеткі нашы зусім маленькія, ясельная група, і яны яе так любяць! 

Няня пасля такіх прэтэнзій напісала заяву на звальненне. А большасць бацькоў вельмі хацела, каб яна засталася і гатовыя патрымліваць яе. Бацькі мяркуюць, што скаржнік мае асабістую непрыязнасць да няні і таму хацеў ёй нашкодзіць.

Бацькам таксама могуць зрабіць заўвагу
– З-за гэтага выпадку нікога не звальнялі з працы, – кажа Наталля Сідарэнка, галоўны спецыяліст сектара арганізацыйна-педагагічнай работы і дашкольнай адукацыі Маладзечанскага райвыканкама. – Няня працягвае працаваць у садку. Па ўсіх пытаннях, якія толькі могуць узнікнуць, бацькі павінны адразу звяртацца да загадчыцы дзіцячага садка.

Не трэба хвалявацца, што заўвагі неяк паўплываюць на стаўленне выхавальнікаў да дзіцяці: чалавечыя адносіны гэта адно, а прафесійныя абавязкі – зусім іншае. Калі праблема не вырашаецца на гэтым узроўні, тады ўжо можна звяртацца ў аддзел адукацыі. Але такое ў нашай практыцы сустракаецца вельмі рэдка. 

Камунікацыя паміж супрацоўнікамі і бацькамі – абавязковая частка працы садкоў. За дзяцей адказныя і бацькі, і выхавальнікі.

У прыватнасці, выхавальнікі і няні таксама маюць права рабіць рэкамендацыі і заўвагі бацьку ці маці. Напрыклад, калі чуюць іх лаянку. 

Калі здараецца такое, што бацькі прыходзяць па дзіця ў нецвярозым стане, выхавальнікі наогул не маюць права аддаваць ім дачку ці сына. У такім выпадку кіраўніцтва звязваецца з органамі апякунства, і яны выршаюць праблему разам. 

“Няхай выхавальнік звяртае больш увагі на дзяцей, чым на іх рэчы”

На пытанні пра адносіны бацькоў і садка адказала загадчыца астравецкага ясляў-садка №2 Алена Канановіч.

Ці могуць бацькі разлічваць, што, калі, напрыклад, дзіця атрымае драпіну ці сіняк, ім патлумачаць прычыну?
– Безумоўна! Як жа іначай? У нас кожную раніцу выхавальнік здае мне справаздачу, у якой пазначае, якія дзеці прысутнічаюць, а якія не.

Калі дзіцяці няма ў садку тры дні, то тэлефануем бацькам ці наведваем іх, каб даведацца, ці ўсё ў парадку.

Пры любой драпіне ці сіняку выхавальнік адразу паведамляе мне і медсястры, каб яна апрацавала, калі трэба. Тут жа звяртаемся да бацькоў. Калі гэта штосьці сур’ёзнае, прапануем забраць дзіця, каб паназіраць за ім дома ці нават звярнуцца да доктара.

Ці адказныя выхавальнікі за згубленыя ці папсаваныя рэчы?
– У службовых абавязках выхавальнікаў нашага садка такой адказнасці няма. Мы просім бацькоў, каб сваім дзецям не давалі ў садок дарагія цацкі, ці, скажам, залатыя ўпрыгожванні. Няхай лепш выхавальнік звяртае больш ўвагі на дзяцей.

Ці могуць выхавальнікі зрабіць заўвагу бацькам, калі тыя дапускаюць, напрыклад, грубыя словы з дзецьмі?
– Так. Але толькі ў індывідуальным парадку.

– У які час можна прыводзіць дзяцей, а калі лепш забіраць?
– У групы дзеці збіраюцца ад 7.45, але заўсёды ёсць дзяжурны выхавальнік, да якога сына ці дачку можна прыводзіць ад 7.30.
Мы рабілі апытанне сярод бацькоў, які час для іх зручны, і іх задавальняе наш распарадак.

Забіраць дзяцей можна да 18.15. Многія бацькі забіраюць раней, асабліва тыя, у каго на працы зручны графік. Але мы раім не забіраць да 17 гадзін, таму што пасля сну ў нас пачынаюцца дадатковыя заняткі, гурткі. Таму лепей не парушаць рэжым.

– Што абавязкова павінна быць у шафе дзіцяці?
– Абутак на змену, як і ўсюды. У нас добрыя выхавальнікі па музыцы і фізічнай культуры, яны праводзяць цікавыя заняткі, таму раім прыносіць спартыўную форму, а таксама шорты і чэшкі.

Калі дзіця пацее, то просім прыносіць запасную майку, каб адзець яе  пасля сну. Для ясельных дзетак адзенне на змену абавязковае.

Вядома, у кожнага павінна быць свая расчоска, якая захоўваецца ў футарале. Пасля сну дзеткам трэба прывесці сябе ў парадак.

– Як бацькі могуць удзельнічаць у жыцці садка?
– Калі мы просім бацькоў паўдзельнічаць у афармленні садка ці падрыхтаваць навагоднія касцюмы, то нам ніколі не адмаўляюць, заўсёды ўдзельнічаюць.

Мы пастаянна абнаўляем выставу малюнкаў і падпісваем, якой сям’і гэты малюнак. 

Да выставы, якую мы сёлета рыхтавалі да Дня маці, бацькі разам з дзецьмі рабілі вырабы, якія прыносілі потым у садок. Што яны толькі не рабілі!

Зоя ХРУЦКАЯ, Аляксандра ПАРАХНЯ.

Фота Алеся ВЫСОЦКАГА.