Падатковая інспекцыя аб’яўляе, што ад другога квартала праводзіцца акцыя “Калі працуеце рэпетытарам, то рабіце гэта легальна!”.

Падчас акцыі супрацоўнікі інспекцыі будуць выяўляць, колькі абітурыентаў карыстаецца паслугамі рэпетытараў. Гэту лічбу параўнаюць з колькасцю рэпетытараў, якія працуюць легальна.

У гэты час будуць звяртаць увагу органаў Міністэрства адукацыі на дзейнасць фізічных асоб і прадпрымальнікаў, якія аказваюць адукацыйныя паслугі. Інспектары будуць вызначаць, які прыбытак атрымліваюць рэпетытары. У выніку працы інспектары выявяць, над чым трэба працаваць, каб рэпетытары плацілі падаткі.

Паводле заканадаўства, рэпетытарства не адносіцца да прадпрымальніцкай дзейнасці, калі чалавек займаецца ім самастойна і не прыцягвае да працы іншых людзей па дагаворах. У такім выпадку рэгістравацца ў якасці прадпрымальніка не трэба.

Для таго, каб пачаць працу рэпетытарам, трэба толькі паведаміць у мясцовы падатковы орган аб сваім намеры і заплаціць адзіны падатак. Выплачваць яго неабходна штомесяц і толькі за тыя месяцы, калі вы працуеце рэпетытарам. Пры гэтым весці ўлік прыбытку і падаваць справаздачы ў падатковы орган не трэба. Усё проста: за тыя месяцы, калі вы працуеце, вы плаціце падатак. Не працуеце – не плаціце.

Стаўка адзінага падатку на Маладзечаншчыне – 150 тысяч рублёў.

Пры гэтым для некаторых прадугледжаныя льготы. Зніжэнне адзінай стаўкі падатку на 20% прадугледжана для:

мужчын, якім споўнілася 60 год, і жанчын, якім споўнілася 55 год,

інвалідаў,

бацькоў (усынавіцеляў) у шматдзетных сем’ях з трыма і больш дзецьмі да 18 год.

Незаконнае рэпетытарства пагражае парушальніку папярэджаннем. Пры паўторным разе – штрафам.

Падатковы орган можа праінфармаваць наконт нелегальнага “бізнесмена” адміністрацыю навучальнай установы. Іх асабовыя дадзеныя могуць быць размешчаныя на афіцыйных сайтах Міністэрства па падатках і зборах і Міністэрства адукацыі.

Паклапаціцеся аб сваёй рэпутацыі. З-за нелегальнага рэпетытарства ваш аўтарытэт можа пахіснуцца. І ніякі прыбытак не дапаможа выправіць сітуацыю.

Як правільна выбраць рэпетытара

Кожны з бацькоў спадзяецца на дзейсную дапамогу прыватнага настаўніка і не паглыбляецца ў працэс навучання. Аднак трэба быць пільнымі: у сферы рэпетытарства шмат выпадковых людзей і нават шарлатанаў.

Інспекцыя Міністэрства па падатках і зборах па Маладзечанскім раёне выступае за прафесійны падыход да справы. Асноўныя крытэрыі якаснага рэпетытара: легальнасць, наяўнасць кваліфікацыі ў педагога, рабочы кабінет (пакой) з вучэбнымі дапаможнікамі і бібліятэкай, індывідуальныя заняткі (строга па адным).

Пачынаць падрыхтоўку да ЦТ пажадана з 10-га класа. Аптымальна займацца па паўтары гадзіны двойчы на тыдзень. Калі такой магчымасці няма, то хаця б раз на тыдзень.

Першыя заняткі пробныя, праводзяцца для таго, каб вызначыць узровень ведаў вучня.

Потым складаецца індывідуальны план падрыхтоўкі і даецца прагноз па балах на ЦТ.

Рэгулярна праводзяцца пробныя тэставанні, задаюцца дамашнія заданні, за якія ставяць адзнакі. Бацькі павінны бачыць вынік заняткаў. Таму вядуць дзённік, як у школе.

Не рэкамендуецца планаваць два заняткі з рэпетытарамі па розных прадметах на адзін дзень.

Пасля 19 гадзін заняткі таксама не прызначаюць: у гэты час зніжаецца ўспрымальнасць вучня.

Калі бацькі вырашылі карыстацца паслугамі рэпетытара, то павінны кантраляваць іх працу. Выбіраючы настаўніка, варта ўлічваць досвед працы педагога і водгукі абітурыентаў мінулых гадоў.

Высокі працэнт паступлення ў ВНУ, вядома, найлепшая рэкамендацыя.

Сяргей КУКЕЛЬ, начальнік Упраўлення кантролю за падаткаабкладаннем індывідуальных прадпрымальнікаў і фізічных асоб інспекцыі Міністэрства па падатках і зборах па Маладзечанскім раёне.

Ад рэдакцыі:

“Мы адчуваем сваю няўпэўненасць”

Мы папрасілі ананімна пракаментаваць аднаго з рэпетытараў, чаму ён шмат гадоў займаўся рэпетытарствам без рэгістрацыі.

– На маю думку, нельга сказаць, што рэпетытары не рэгіструюцца з-за таго, што не хочуць плаціць падаткі. Насамрэч падатак не такі і высокі. Калі настаўнік не выкладае ў школе і ўвесь свой час можа прысвяціць рэпетытарству, то ён атрымае добры прыбытак і з вылікам падаткаў.

Я ведаю настаўнікаў, якія кінулі асноўную працу ў школе і зарэгістраваліся. Але не кожны згодны на гэта пайсці. Часцей людзі імкнуцца сумяшчаць дзве працы.

Ахвотных зарэгістравацца пужае і бюракратызм: трэба сабраць шмат дакументаў, каб атрымаць дазвол на індывідуальнае выкладанне.

Наша бяда яшчэ і ў тым, што мы не да канца ўяўляем сабе, як працуе рэгістрацыя.

Напрыклад, калі я давяла да ЦТ сваіх вучняў і вырашыла кінуць рэпетытарства, што я павінна рабіць? Як скасаваць рэгістрацыю? Ці магчыма гэта ўвогуле? Ці з мяне яшчэ некаторы час будуць здымаць падаткі? У многіх ёсць прабелы ў прававых ведах. Мы адчуваем сваю няўпэўненасць у гэтай сферы, таму часта вырашаем абысці ўсе “папяровыя” справы.

Сяргей КУКЕЛЬ, Аляксандра ПАРАХНЯ.

Фота velvet.by.