Каля кантэйнераў у Насілаве смецце прыбралі, а таксама змянілі графік яго вывазу.

Пасля публікацыі “Хацелі б такі від з акна?” філіял УП “Камунальнік” “Раённая ЖКГ” даслаў рэдакцыі ліст з адказамі на пытанні, якія падняла газета.

Як часта вывозяць камунальныя адходы

Цвёрдыя камунальныя адходы ў Насілаве вывозяць па графіку. Яго ўзгадніў старшыня Цюрлёўскага сельсавета і зацвердзіў начальнік філіяла раённай жыллёва-камунальнай гаспадаркі. Графік склалі паводле схемы абыходжання з камунальнымі адходамі, якую зацвердзіў Маладзечанскі райвыканкам.

Аднак у студзені сапраўды былі парушэнні графіка збору смецця з-за неспрыяльнага надвор’я.

Каб палепшыць якасць абслугоўвання жыхароў Маладзечанскага раёна, ад лютага перагледзелі графік збору смецця ў блізкіх да горада населеных пунктах, сярод якіх Насілава. Вырашылі часцей вывозіць смецце з кантэйнераў.

Цяпер у Насілаве смецце вывозяць тройчы на тыдзень: у панядзелак, сераду і пятніцу.

Як прыбіраюць пляцоўкі ля кантэйнераў

Прыбіраць кантэй­нерныя пляцоўкі ад смецця − адзін з абавязкаў грузчыкаў. Яны павінны гэтым займацца, калі аб’язджаюць на спецтранспарце па графіку, акрамя буйных адходаў.

На момант публікацыі артыкула кантэйнерныя пляцоўкі ў Насілаве прыбралі па-за графікам. За іх неналежны санітарны стан адказных прыцягнулі да дысцыплінарнай адказнасці.

Ці можна пераставіць кантэйнеры

Спецыялісты філіяла разглядаюць скаргі і прапановы па колькасці і месцах для кантэйнераў. Па магчымасці задавальняюць іх, улічваючы санітарныя правілы і нормы.

Пытанні мясцовым жыхарам

Жыхары не заўсёды выконваюць патрабаванні заканадаўства па абыходжанні са смеццем, а таксама ўмовы дагавора па вывазу адходаў.

1. З-за таго, што людзі самавольна выкідаюць у кантэйнеры некамунальныя адходы, а будаўнічыя і раслінныя, перапаўняюцца кантэйнеры і ламаецца спецтранспарт.

2. Людзі выкідаюць смецце ля кантэйнераў, нават калі кантэйнеры не запоўненыя.

3. Выкідаюць у кантэйнеры для смецця другасную сыравіну.

Работнікі раённай ЖКГ дадаюць напрыканцы ліста, што спецыялісты пастаянна тлумачаць людзям, як правільна абыходзіцца са смеццем.

Зоя ХРУЦКАЯ.