За год першакласнік “падаражэў” на мільён. Колькі грошай трэба, каб адправіць дзіця ў школу? Лічым разам

− Спіс мы складаем разам з настаўнікамі пачатковых класаў, − кажа Іна Шыянок, псіхолаг маладзечанскай СШ №5. − Ён сапраўды неабходны, бо на кожнай сустрэчы з бацькамі будучых першакласнікаў абавязкова ўзнікаюць пытанні наконт таго, што пакласці ў ранец дзіцяці.

– Вядома, – працягвае яна, – мы даём толькі агульныя рэкамендацыі. Бацькі ўжо самі выбіраюць, дзе і па якім кошце набываць рэчы. Напрыклад, даём парады пра тое, каб у ранцы былі шырокія лямкі. А ручкі для пісьма – рабрыстай формы. Менавіта такой дзіцяці зручней усяго будзе пачынаць пісаць.

Праграма навучання таксама мяняе набор неабходных рэчаў. Некаторыя настаўнікі вучаць дзяцей лічыць разам з лічыльнымі палачкамі, некаторыя – без. Гэтыя дробязі абгаворваюцца пры паступленні ў канкрэтны клас.

У маці першакласніцы валасы сталі дуба

Спіс значна падаражэў пасля таго, як у школах увялі дзелавы стыль адзення. Школьная форма, хоць яе і часцей за ўсё можна набываць на любы густ і кошт, дадала клопату бацькам. Сёлета на форму давядзецца патраціць 1,5-2 мільёны. 

Маці першакласніцы Святлана падзялілася сваімі ўражаннямі ад паходу па магазінах за школьнай формай і прыналежнасцямі:

− Паглядзела ў магазінах і на рынку сарафан, блузку для сваёй дачкі. У мяне валасы на галаве сталі дуба, калі я ўбачыла цэны! Блузка для дзяўчынкі ў некаторых з іх каштуе як адзенне для дарослага! Канешне, усё прыгожае, аднак жа дзеці растуць, усё даводзіцца купляць кожны год.

Канцылярскія тавары разам з формай зацягнуць каля мільёна. Вядома, выніковая сума залежыць ад таго, куды вы хадзілі за абноўкамі – на рынак ці ў краму.

Мы праводзілі свае падлікі ў адной з дзяржаўных крамаў Маладзечна. Дарэчы, летась па такіх жа падліках “Рэгіянальнай газеты” сабраць першакласніка ў школу каштавала ў сярэднім два мільёны рублёў. Па сёлетніх падліках гэта абыдзецца ў тры мільёны.

Што трэба набыць да школы

Спіс, па якім мы вялі падлікі, можна знайсці на сайтах маладзечанскіх школ. У яго ўваходзяць два сшыткі ў вялікую клетку, тры сшыткі ў вузкую лінейку, папка для сшыткаў, абгорткі для кніг і сшыткаў, закладкі, два блокі для чарчэння ці для малявання, вялікі набор каляровай паперы і кардона, каляровыя алоўкі (не менш за 12 штук), набор фламастараў.

У пенале павінна быць дзве ручкі, два простыя алоўкі, лінейка, тачылка, ласцік. Таксама нажніцы у чахле, клей ПВА, клей-аловак, пэндзаль для клею і для фарбаў, акварэльныя фарбы, кубачак-невылівайка, пластылін, кляёнка, 30 файлаў, кнопкі ці сашчэпкі.

З сабой трэба ўзяць і дзве расфарбоўкі, настольную гульню. Не забудзьцеся купіць спартыўную форму і абутак.

У спісе не ўказаны ранец ці заплечнік, школьная форма, зменны абутак, туфлі ці сандалікі, у якіх ваша дзіця будзе хадзіць у школу. Але іх мы таксама ўзялі ў разлік.

Падрабязная табліца з коштамі.