Першыя заняткі бясплатных моўных курсаў адбудуцца 15 верасня ў кавярні “Накат” (ГЦ “Тройка”, 4 паверх) а 19-й гадзіне.

Вы цудоўна адпачылі гэтым летам, але стаміліся ад таго, што побач з вамі гучала толькі іспанская і грэчаская мовы? Тады вам да нас!

Таму што на занятках “Мовы Нанова” гучыць толькі родная, беларуская.

Вы цудоўна папрацавалі гэтым летам на лецішчы? Але стаміліся насіць з агародаў вёдры памідораў і мяхі бульбы? Тады вам да нас!

Таму што на занятках “Мовы Нанова” самае цяжкае, што вам давя­дзецца падымаць, – гэта асадкі і алоўкі.

Вашы дзеці пайшлі ў школу і штовечар даймаюць вас просьбамі зрабіць урокі? Тады вам да нас!

Таму што мы ведаем, як зрабіць так, што мова для вашых школьнікаў будзе толькі ў радасць.

Вы не ведаеце куды запрасіць на спатканне дзяўчыну? Тады вам да нас.

Таму што ў нас у канцы кожных заняткаў выступаюць модныя беларускамоўныя гурты і выканаўцы.

Усё гэта чакае вас цягам года, а першыя заняткі мы прысвецім самай вераснёўскай тэме – “Адукацыя”.

Пагутарым і паспрачаемся на тэму платнай адукацыі і абавязковай адпрацоўкі пасля заканчэння ВНУ. А таксама вас, як заўсёды, чакае шмат карыснай інфармацыі, сюрпрызаў, гульняў і падарункаў.

Наталля ТУР, Настасся РОЎДА, вядоўцы курсаў “Мова Нанова” ў Маладзечне.

Хто прыйдзе на першыя заняткі ў беларускай вышыванцы – атрымае ў падарунак фірменны нататнік “Мовы Нанова”. Майкі з машыннай вышыўкай і прынтамі таксама залічваюцца.

Таксама:

“Мова Нанова” ў Маладзечне развіталася да верасня (Дадалося відэа)

«Тры метры над узроўнем семак»: прайшлі трэція заняткі «Мовы Нанова» ў Маладзечне (Фотагалерэя)

Другія заняткі «Мовы Нанова – Мала93ечна» ізноў сабралі 60 чалавек (Фотагалерэя)

Першыя заняткі «Мовы Нанова» ў Маладзечне сабралі 60 чалавек (Фотагалерэя, дадалося відэа)