Чаму шэф-повар аднаго з рэстаранаў Мала­дзечна адзначае Новы год на рабоце. Што будзе на яго святочным стале. Чым улаго­дзіць сімвал надыхо­дзячага года – Казу.

Шэф-повар аднаго з рэстаранаў Маладзечна Дзмітры Місюк спрабаваў паступіць на повара ў Мінскі дзяржаўны гандлёвы каледж тры разы. Трэці раз і стаў для яго паспяховым. Ён не можа патлумачыць, чаму менавіта гэту спе­цыяльнасць выбраў, мяркуе, што прафесія сама паклікала яго.

Гатую стэйк – адчуваю, што робіцца з мясам

Прафесію повара ён лічыць мужчынскай.

– Шмат розных  муж­чын мела поспех у гэтай справе, – гаворыць Дзмітры. – Ёсць нават меркаванне, што менавіта мужчыны могуць адчуць, чаго не хапае ў страве. Мужчыны-повары ў асноўным на кухні толькі на рабоце. Таму гэта не надакучвае, падштурхоўвае да новых здзяйсненняў.

Дома ласуецца тым, што прыгатавала маці. Асабліва яму падабаюцца катлеты.

– Хоць і працую шэф-поварам, – заўважае Дзмітры. – Аднак такія ніколі не атрымліваюцца. Сырнікі ў мамы чамусьці падобныя  на пончыкі.

Малады чалавек гаворыць, што адчувае прадукты, з якіх гатуе.

– Калі гатую стэйк, – заўважае хлопец, – здаецца, адчуваю, што робіцца з мясам, наколькі яно насычанае, калі прыгатаванае.

 

Шэф-повар прызнаецца, што ніколі не гатуе сам для сябе – не любіць гэтага рабіць. Нашмат лепш радаваць іншых.

Шэф-повар прызнаецца, што ніколі не гатуе сам для сябе – не любіць гэтага рабіць. Нашмат лепш радаваць іншых.

На навагоднім стале будзе “Гарошак”, “Шуба”

Шэф-повар не чакае ад свята нейкіх незвычайных падарункаў, падзей. Магчыма, толькі пераменаў да лепшага.

Падарункі будзе набываць у апошні дзень.

Шэф-повар не чакае ад свята нейкіх незвычайных падарункаў, падзей. Магчыма, толькі пераменаў да лепшага.  Падарункі будзе набываць у апошні дзень.

Шэф-повар не чакае ад свята нейкіх незвычайных падарункаў, падзей. Магчыма, толькі пераменаў да лепшага. Падарункі будзе набываць у апошні дзень.

 

– Затое ўсё адразу, – усміхаецца Дзмітры. – Стараюся выбраць падарункі па асацыяцыі з чалавекам. Галоўнае ж у падарунку не цана, а ўвага да чалавека, магчымасць зрабіць яму прыемнае.

Шэф-повар прызнаецца, што ніколі не гатуе сам для сябе – не любіць гэтага рабіць. Нашмат лепш радаваць іншых. На Новы год малады чалавек будзе працаваць. Аднак гэта яго не засмучае.

– На рабоце заўсёды весела, – гаворыць ён. – Вельмі крута ад таго, што людзі радуюцца. Ад гэтага ў самога настрой падымаецца.

Навагодні стол у доме Дзмітрыя Місюка падрыхтуе маці.

– Будзе запечаная курыца, – расказвае Дзіма. – Маці робіць яе на бутэльцы, што цяпер не ў модзе. Большасць запякаюць курыцу ў спе­цыяльных пакетах. Аднак смак не той. Абавязкова “Гарошак”, “Шуба”, мяса па-французску. Усё традыцыйна.

Чым улагодзіць сімвал надыходзячага года – Казу

2015-ы – год Казы, або Авечкі. Аднак, каб год удаўся, гаспадыні спрабуюць задобрыць яе адпаведнымі стравамі.

Козы – жывёлы траваедныя. Ім спадабаюцца салаты з ужываннем гародніны, асабліва морквы, капусты, бурака. Апошні інгрэдыент уваходзіць у склад селядцоў пад шубай. Таму гэта салата можа стаць хітом навагодняга стала.

Садавіна, стравы з малочных прадуктаў, разнастайныя сыры дапамогуць задобрыць сімвал надыходзячага года. Вельмі сімвалічна, калі на стале будзе страва, якая нагадвае авечку.

Ад мяса адмаўляцца не варта. Гарачымі стравамі могуць быць запечаная курыца, бараніна, свініна. Іх абавязкова трэба пасыпаць травамі. Ежы на стале трэба дастаткова, але яна павінна быць лёгкай і карыснай.

А вось кансервы, паўфабрыкаты наўрад ці спадабаюцца Казе.

Пры сервіроўцы стала можна выкарыстаць драўляны посуд або элементы з дрэва. Стол лепш заслаць сінім або зялёным абрусам.  У якасці ўпрыгожвання выкарыстаць фігурку авечкі, галінкі елкі.

Рэцэпты навагодніх страў

Салата “Авечка”

Інгрэдыенты: 300 грамаў курынага філе, 200 грамаў ананасаў, 100 грамаў сыру, два-тры яйкі, 100 грамаў маянэзу. Для ўпрыгожання зеляніна і адна-дзве масліны.

Спосаб прыгатавання

Намалюйце маянэзам два кругі. Адзін – для цела авечкі, другі – для галавы. Курыцу адварыце і астудзіце, нарэжце невялікімі кавалкамі. Затым пакладзіце слой з ананасаў, сыр надзярыце на дробнай тарцы. Кожны слой прамазвайце маянэзам.

Яйкі адварыце і аддзяліце жаўткі ад бялкоў. Спачатку трэба пакласці жаўток. Бялок на­дзярыце на дробнай тарцы і пакладзіце яго на тулава авечкі. З бялка можна зрабіць на галаве авечкі шапачку, з маслін – вушкі, вочы, рот і нос.

Зрабіце авечцы ногі і хвост. З зеляніны – луг. Салату падавайце праз некалькі гадзін пасля прыгатавання, каб слаі добра прамоклі.

Сырны рулет

Інгрэдыенты: 400 грамаў сыру, адна вэнджаная грудка, 100 грамаў шампіньёнаў, тры сталовыя лыжкі алею.

Спосаб прыгатавання

Сыр надзярыце на буйной тарцы, загарніце ў харчовую плёнку. Апусціце яе ў ваду, якая кіпіць, аднак не датыкайцеся да дна. Варыце, пакуль сыр не стане мяккім. Раскатайце яго, не вымаючы з плёнкі.

Калі ў вас атрымаўся сырны пласт, плёнку можна зняць. Для начыння парэжце шампіньёны маленькімі кавалачкамі і абсмажце на масле. Курыную грудку парэжце і змяшайце з грыбамі. Выкладзіце ўсё на сырны пласт, скруціце рулетам, загарніце ў цэлафан і пакладзіце ў халадзільнік. Упрыгожце пасля зелянінай.

Салата “Ёлачка”

Інгрэдыенты: 300 грамаў нятлустай свініны, дзве бульбіны, тры звараныя ўкрутую яйкі, дзве цыбуліны, два салёныя агуркі, адна морквіна, маянэз.

Для ўпрыгожвання: кроп, гарошак, агурок, жоўты ці чырвоны перац.

Спосаб прыгатавання

Адварыце мяса, гародніну, яйкі. Усе інгрэдыенты нарэжце кубікамі і перамяшайце. Запраўце маянэзам. Салату выкладзіце горкай на плоскую талерку.

Зверху змажце маянэзам, упрыгожце галінкамі кропу. З чырвонага перцу зрабіце зорачку, пастаўце на макушку ёлкі. З перцу – кружочкі для ёлачкі.

Калі выкладаеце салату ў талерку, ёлку можна зрабіць з гарошку.

Тарталеткі з сырам

Інгрэдыенты: дзве ўпакоўкі тарталетак па дзесяць штук, тры плаўленыя сыркі, тры курыныя яйкі, тры зубкі часнаку, 150 грамаў маянэзу.

Спосаб прыгатавання

Яйкі зварыце і надзярыце на дробнай тарцы. Плаўленыя сыркі пакладзіце ў маразілку, пасля надзярыце на буйной тарцы. Выцісніце часнок праз часночніцу. Змяшайце ўсё з маянэзам. Атрыманую масу пакладзіце ў тарталеткі.

Тарталеткі с сырам.

Тарталеткі с сырам.

Салата “Навагодні баль”

Інгрэдыенты: 5 яек, адно філе, шклянка чарнасліву, дзве цыбуліны і морквіны, па палове бляшанкі кукурузы і гарошку, 300 грамаў грыбоў (лепш шампіньёнаў), маянэз.

Спосаб прыгатавання

Адварыце яйкі і мяса, парэжце гародніну, грыбы абсмажце з цыбуляй. Выкладзіце інгрэдыенты слаямі, прамажце маянэзам.

Жэле смятаннае

Інгрэдыенты: чатыры пачкі жэле, 15 грамаў харчовага жэлаціну, 300 грамаў смятаны, 100 мілілітраў малака, 50 грамаў цукру, палова чайнай лыжкі ванільнага цукру.

Спосаб прыгатавання

Змешваем жэлацін з малаком і пакідаем на паўгадзіны, каб жэлацін растварыўся.

Гатуем фруктовае жэле, згодна з інструкцыяй на ўпакоўцы. Гэта будзе першы слой. Пасля прыгатавання заліваем яго ў глыбокі  посуд, прыбіраем у халоднае месца.

Можна заняцца малочным жэле. У разбухшы жэлацін з малаком дадаём смятану і цукар. Грэем на маленькім агні, каб жэлацін растварыўся. Астуджваем прыкладна да 40 градусаў.

Калі першы слой застыў, заліваем малочнае жэле. Пасля  фруктовае. Такім чынам чаргуем слаі.

Прыгатаваны дэсерт можна перавярнуць у асобную талерку або рабіць парцыйна ў маленькіх кубачках.

Жэле смятаннае.

Жэле смятаннае.

Салата “Падарунак”

Інгрэдыенты: 300 грамаў курынай грудкі, тры марынаваныя агуркі, тры яйкі, адна морква, 300 грамаў шампіньёнаў, адна цыбуліна, маянэз, чырвоны перац.

Спосаб прыгатавання

Грудку, моркву, шампіньёны, яйкі адварыце. Калі астынуць, парэжце кавалачкамі. Цыбулю папырскайце воцатам і лімонам, абдайце кіпенем. Так цыбуля не бу­дзе горкай. Выкладаем слаі салаты: грудка, агуркі, морква, яйкі, цыбуля, шампіньёны. Кожны слой прамазвайце маянэзам. Напрыканцы малымі кавалкамі нарэжце перац, упрыгожце ім салату. Са свежых агуркоў можна зрабіць стужачкі і бант.

Курыныя рулецікі

Інгрэдыенты: курыная грудка, два яйкі, 200 грамаў мукі, 300 грамаў грыбоў, адна цыбуліна, 100 грамаў цвёрдага сыру, соль, перац, алей.

Спосаб прыгатавання

Памыйце грудку, прасушыце яе. Разрэжце адну палавіну грудкі ўздоўж, але не даразайце да канца. Атрымаецца як кніга. Пасаліце, паперчыце, дайце пастаяць.

За гэты час падрыхтуйце начынне. Абсмажце грыбы з цыбуляй, дадайце туды сыр, надзёрты на дробнай тарцы. Пакладзіце начынне ўнутр курынай грудкі. Каб яно не вылезла, замацуйце краі зубачысткамі. Укачайце курыныя рулецікі ў муку, абсмажце. Рулецікі можна пратушыць, яны будуць мякчэйшыя.

Салата-рулет “Пянёк”

Інгрэдыенты

Для бліноў: два яйкі, мука, шклянка малака, цыбуліна, зеляніна, соль, папрыка.

Для салаты: тры яйкі, па дзве морквіны і бульбіны, маянэз, апенькі марынаваныя, вяндліна, зеляніна.

Для ўпрыгожвання: плаўлены сырок, два яйкі, апенькі марынаваныя, зеляніна.

Спосаб прыгатавання

Спячыце бліны. Для колеру дадайце папрыку, дробнапарэзаную цыбуліну і зеляніну. Атрымаецца 6 бліноў. Іх змажце маслам.

Для начыння надзярыце на тарцы бульбу і моркву, змяшайце. Дадайце парэзаныя яйкі, вяндліну і грыбы. Запраўце маянэзам.

Зрабіце пянёк. Па­кладзіце на стол поліэтыленавую плёнку. Разрэжце бліны. Змажце адзін бок плаўленым сырком, пакладзіце на плёнку.

Уздоўж бліноў пакладзіце начынне. Адзін бок плёнкі згарніце ў рулет. Павінна атрымацца роўная плоскасць. Гэты бок і стаўце на талерку, з яго атрымаецца пень. Калі тырчаць канцы ад бліноў, абрэжце іх. Зрабіце з іх карэньчыкі. Упрыгожце пянёк зелянінай і грыбамі.

Салата-рулет “Пянёк”.

Салата-рулет “Пянёк”.

Рэцэпт навагодняй стравы і парады ад шэф-повара рэстарана “Гатэль” Дзмітрыя Місюка

Фрыкасэ з індычкі (на адну порцыю)

Інгрэдыенты: 130 грамаў грудкі індычкі, па 25 грамаў цыбулі і фасолі стручковай, па 40 грамаў памідораў-чэры, радыскі і морквы, чабор і мёд. Апошні інгрэдыент з’яўляецца галоўным узмацняльнікам смаку.

Спосаб прыгатавання

Грудку нарэжце буйнымі кавалкамі, цыбулю паўкольцамі, радыску і памідоры напалову, моркву кружочкамі. Зварыце фасолю.

Грудку абсмажвайце і па чарзе дадавайце цыбулю, потым моркву, радыску, фасолю. У канцы памідоры з мёдам. Повар адзначае, што вельмі важна захоўваць паслядоўнасць кожнага інгрэдыента. Пасля таго, як усё дадалі, гатуем сем хвілін. 

Час прыгатавання стравы – 25 хвілін.

Вялікія кавалкі і менш маянэзу

Пры прыгатаванні салатаў на Новы год шэф-повар Дзмітры Місюк раіць рэзаць інгрэдыенты буйнымі кавалкамі, каб адчуць смак кожнага з іх. Таксама дадаваць у салаты менш маянэзу. Лепш выкарыстоўваць запраўкі з алеем, ягадамі, арэхамі. Ці прыгатаваць маянэз у дамашніх умовах.

Дамашні маянэз

Інгрэдыенты: яйка, гарчыца, аліўкавы алей, лімон для смаку, каперсы. Менавіта яны дадаюць пікантнасці страве.

Усе інгрэдыенты ўзбіце блэндарам – маянэз гатовы.