Людзі, якія няправільна харчуюцца, рызыкуюць набыць сабе праблемы са сном, сардэчна-сасудзістай сістэмай і лішняй вагой. Участковы доктар-тэрапеўт загадчыца тэрапеўтычнага аддзялення паліклінікі №3 Жанна Кісель раіць, што есці, каб не мець такіх праблем, і як правільна харчавацца.

Доктар адзначае, што галоўнае, каб харчаванне было разнастайнае і збалансаванае. Есці трэба рэгулярна – тры разы на дзень.

Перакусы вядуць да паўнаты

– Калі чалавек галодны, то ў яго раздражнёная слізістая абалонка страўніка, парушаецца яго работа,  – гаворыць доктар. – Страўнік працуе больш актыўна, вылучае большую колькасць сокаў, якія павінны ісці на пераварванне ежы. Атрымліваецца, арганізм працуе ўпустую.

Нерэгулярныя прыёмы ежы прыводзяць да застою ў страўніку. Гэта ў далейшым выклікае праблемы з пераварваннем ежы, з пазбаўленнем яе з арганізма.

– Людзі, якія харчуюцца незбалансаванай ежай, а перакусваюць, у большасці выпадкаў ужываюць нездаровую ежу – гамбургеры, чыпсы, булачкі, – заўважае Жанна Кісель. – Гэтыя стравы вельмі смачныя, аднак карысці не нясуць.  Вугляводы, якія ёсць у гэтых стравах, накопліваюцца ў арганізме, паступова прыво­дзяць да праблем з лішняй вагой.

Калі ж чалавек не можа адмовіцца ад перакусаў, лепш з’есці садавіну. Яна адгоніць голад, будзе спрыяць таму, каб не было застою ў страўніку.

Не ешце хутка – не будзе лішняй вагі

Тыя, хто есць хутка, таксама рызыкуюць мець праблемы з лішняй вагой.

– Не спяшайцеся есці, – раіць спецыяліст. – Тады хутчэй прыходзіць адчуванне насычэння. Галаўны мозг паступова рэагуе, што арганізм сыты. Калі ж чалавек есць хутка, то мозг не паспявае зарыентавацца, таму прыходзіцца з’есці нашмат больш, чым звычайна. Але пасля гэтага прыходзіць адчуванне цяжкасці ў страўніку.

Правільна спалучайце прадукты

Ноччу адпачываеце самі, значыць, дайце спакой і страўніку. Часта чалавек з перагружаным страўнікам доўга не можа заснуць. Таксама ад начнога пераядання можа сціскацца дыяфрагма, таму сэрца не бу­дзе працаваць на поўную моц.

– Важна правільна спалучаць прадукты. Напрыклад, рыбу і мяса лепш есці з гароднінай, салатамі з яе, – гаворыць спецыяліст. – Гэта паляпшае  пераварванне, больш насычае арганізм, змяншае ўзровень халестэрыну. Калі змешваць розныя стравы за адзін прыём ежы, страўніку горш зарыентавацца, ежа пераварваецца даўжэй. А чалавек адчувае цяжкасць.

Ваду, чай, каву лепш не піць у час і пасля яды. Гэта ўскладняе пераварванне. Таму лепш ужываць ваду за гадзіну, паў­гадзіны да прыёму ежы.

Не злоўжывайце чаем і кавай, у якіх ёсць кафеін, ад якога можа павысіцца ціск, балець галава.

Шыпучыя напоі перабіваюць апетыт

– Таксама такія напоі раздражняюць слізістую абалонку страўніка, – сцвярджае Жанна Кісель. – Чалавек адчувае цяжкасць, уздуцце.  Аса­бліва важна прытрымлівацца гэтага правіла людзям, якія маюць праблемы са страўнікам.

Менш ужывайце тлустых страў: смятаны, маянэзу, цвёрдых сыроў. Халестэрын адкладваецца на сценках сасудаў, пасля ад гэтага церпіць сэрца. Мяса лепш ужывайце поснае, курыцу – без скуркі. Гэта простыя правілы, каб пазбегнуць атэрасклерозу сасудаў.

Тым, хто любіць салодкае, медык рэкамендуе замяняць салодкасці сухафруктамі, ягадамі, гароднінай, стравамі з пекцінам – зефір, мармелад.

На абед можна абысціся без супу

Традыцыйны абед складаецца з першай стравы – супу, другой стравы і кампоту.

– Канешне, першыя стравы карысныя для страўніка. Спрыяюць таму, каб у чалавека не было гастрыту, язвы, – адзначае медык. – Аднак не ва ўсіх атрымліваецца есці іх у абед. Таму смела можна ўжываць толькі другія стравы. А ўвечары з’есці суп. 

Калі раніцай доктар раіць есці кашу, каб пачаць работу страўніка, то на абед лепш мясныя стравы, рыба ў спалучэнні з гароднінай. Такая ежа будзе спрыяць лепшай рабоце, дасць сілы да канца дня.

Спецыяліст не раіць есці на абед стравы хуткага прыгатавання –  вермішэлі, пюрэ.

– Канешне, больш карысна ўжываць свежапрыгатаваную ежу, – пагаджаецца Жанна Кісель. – Але калі няма выйсця, то гэта лепш, чым страўнік будзе “пераварваць сам сябе”.

Стравы хуткага прыгатавання спатрэбяцца тым, хто часта знаходзіцца ў дарозе. Яны псуюцца толькі тады, калі доўга пастаяць прыгатаваныя.