На гэтым тыдні мы папрасілі нашых чытачоў у інтэрнэце падзяліцца, якія вуліцы іх горада патрабуюць тэрміновага рамонту.

У топ дарог трапілі:

1. Усе дарогі на Лясных

2. Вуліца Бухаўшчына

3. Двары вуліцы Францыска Скарыны ля дамоў № 27 А, Б, В, Г

4. Алаізы Пашкевіч

5. Вялікі Гасцінец (ля гімназіі № 10)

6. Вуліца Ясінскага

7. Вуліца Маладачанская

8. Вуліца Меліярацыйная

9. Завулак Бярозавы

10.Вуліца Таміліна ( ад ЗАГСа да вуліцы Лібава-Роменскай)

Адметна, што хаця пытанне тычылася ўсяго рэгіёна, актыўнічалі толькі жыхары Маладзечна.

Вось што яны пісалі ў абмеркаваннях:

Эдуард: раён вуліцы Вялікі Гасцінец, ад архіва да мэблевага магазіна. І гэта ў самым цэнтры горада. Сорам!

Вікторыя Разумоўская: “ляжачы паліцэйскі” ў шостым мікрараёне. Ён увесь разламаны, а нікому і справы няма.

Пра гэтага “ляжачага паліцэйскага” ўзгадвае таксама і Ларыса Калінічэнка:

– А я балдзею ад “ляжачага паліцэйскага” па Вялікім Гасцінцы, які знаходзіцца паміж паваротам на 14 школу і паваротам да “Каравана”. У мінулым годзе зрабілі.  А цяпер такія выбоіны, што ўсе, хто ведае, аб’язджае па дарозе каля ДАІ.

Сяргей Петухоў: вуліца Бухаўшчына – яшчэ з мінулага стагоддзя абяцаюць пакласці асфальт!

Сяргей Фурс: вуліца Маладачанская. Гарадскі аўтобус ходзіць па гравійцы. Ад пылу форткі ў дамах адкрыць немагчыма.

Іван Малінец: завулак Бярозавы. Як не паклалі асфальт да “Дажынак”, так, падобна, пры маім жыцці і не пакладуць. Нават грэйдар за 15 гадоў ні разу не заехаў. Як жыць !?

Жыхар: вуліца Меліярацыйная мяне хвалюе. Няўжо няма сродкаў, каб зрабіць рамонт на такой невялікай вуліцы. Трэба ж неяк і аддаленыя вуліцы рамантаваць!

За год адрамантуюць чатыры вуліцы

Рамонтам гарадскіх вуліц займаецца “Камунальнік”. Начальнік вытворча-тэхнічнага аддзела Таццяна Паляковіч распавяла “Рэгіянальнай газеце”, якія ж вуліцы горада сёлета дачакаюцца капітальнага рамонту і асфальтавання.

Капітальны рамонт плануюць зрабіць на пешаходнай дарожцы на ўчастку вуліцы Велікасельскай ад школы №1 да аўтобуснага парка №4.

Адрамантуюць вуліцу Ясінскага. Зробяць пешаходны пераход на скрыжаванні вуліцы Прытыцкага і вуліцы Лібава-Роменскай.

Таксама завершаць будаўніча-мантажныя работы па вуліцы Вольнай.

Пешаходныя дарожкі заасфальтуюць па вуліцах Міру, Таміліна, Францішка Скарыны. Заасфальтуюць праезную частку вуліц Паўночнай і Гідратэхнікаў. А таксама правядуць паверхневую апрацоўку ўчастка вуліцы Францішка Скарыны (ад Вялікага Гасцінца да Будаўнікоў).

– Аднак рамонт гэтых дарог будзе магчымы толькі пры дастатковым фінансаванні, – удакладніла Таццяна Паляковіч.