Ва ўсіх правераных аб’ектах гандлю ў першым квартале санітарна-эпідэміялагічная служба знайшла парушэнні.

Такія вынікі прынеслі праверкі выканання санітарна-эпідэміялагічнага заканадаўства аб’ектамі гандлю і грамадскага харчавання, у тым ліку прыдарожнага сэрвісу.

Доктар-гігіеніст Вілейскага раённага цэнтра гігіены і эпідэміялогіі Алена Ліхачэўская прывяла асноўныя парушэнні:

– гандлююць прадуктамі з прайшоўшым тэрмінам прыдатнасці,

– парушаюць правілы таварнага суседства і тэмпературны рэжым захоўвання,

– не ўказваюць дату і час, калі адкрылі спажывецкую ўпакоўку,

– прадукцыя падазронай якасці,

– не ствараюць умоў для асабістай гігіены персаналу;

– ставяць харчовую прадукцыю ў тары на падлозе;

– памяшканні не прыбіраюць па меры неабходнасці;

– перамяшчаюць прадукты з тары пастаўшчыка ў іншую тару, якую не мыюць і не дэзінфіцыруюць.

Штрафы на мільёны

Па матэрыялах праверак прыцягнулі да адміністрацыйнай адказнасці 126 службовых асоб на суму больш за 137 мільёнаў рублёў і чатыры юрыдычныя асобы на 36 мільёнаў рублёў.

За невыкананне прадпісанняў на восем кіраўнікоў склалі пратаколы аб адміністрацыйным правапарушэнні. Справы накіраваныя ў суд. Вынеслі дзесяць прадпісанняў аб прыпыненні дзейнасці, сем прадпісанняў аб скарачэнні асартыментнага пераліку, прыпынілі чатыры аб’екты гандлю.

– За апошнія гады прадукцыі з прайшоўшым тэрмінам прыдатнасці на прылаўках крамаў стала менш. Аднак падобныя выпадкі здараюцца, нягледзячы на тое, што сумы штрафаў значна павялічыліся,  – кажа Алена Ліхачэўская 

Агулам забаранілі рэалізоўваць амаль 300 кілаграмаў прадукцыі.

Пакупнікі ўстаюць на абарону гандляроў-парушальнікаў

Здзіўляюць прадстаўнікоў санітарнай службы выпадкі з пакупнікамі, якія здараюцца пры праверцы выязнога гандлю. Пункт прывозіць вялікі асартымент тавараў: сярод іх ёсць і замарожаныя прадукты, і мяса-кілбасы, сыры. Усе гэта прадаецца без неабходнага халадзільнага абсталявання, нават калі ўжо цёпла.

– Прыходзіш, кажаш людзям: “Вы ж купляеце недабраякасную прадукцыю”, пачынаеш выяўляць парушэнні, – прыгадвае Алена Ліхачэўская. – Некаторыя пакупнікі пачынаюць пярэчыць: “Вы нам перашкаджаеце купляць. Тут добрыя тавары, нас усё задавальняе”. А потым пачынаюць скардзіцца, што кепскую прадукцыю купілі.

А на крамы скаргаў ад пакупнікоў у апошні час стала менш. Лічыць спецыяліст, што ў многім з-за таго, што стала больш крамаў самабслугоўвання, дзе можна ўважліва разгледзець тавар.