Надыход вясенне-летняга сезона вымушае прыво­дзіць сябе ў належную фізічную форму, рухацца, часцей бываць на прыродзе.  І без ровара гэта зрабіць магчыма, але цяжка.

У артыкуле мы сабралі месцы, дзе вы ў рэгіёне можаце ўзяць яго напракат.

МАЛАДЗЕЧНА

Сёлета ўзяць ровар напракат можна ў гандлёва-эканамічным каледжы. Пра гэта “Рэгіянальнай газеце” распавёў кіраўнік фізічнага выхавання каледжа Юры Бядрыцкі. 

Дзве гадзіны велавандроўкі абыдуцца вам у 30 тысяч рублёў. Калі ж браць ровар на суткі – каштаваць гэта будзе 60-70 тысяч.

Узяць веласіпед напракат можна да 18:00 ва ўсе дні, акрамя выхадных.

Сёння ў “велапарку” каледжа ёсць чатыры ровары. Працаваць велапракат будзе да канца сезона.

Яшчэ адзін велапракат працуе ў Доме быту, што па вуліцы Будаўнікоў.

Там суткі пракату дарожнага ровара будуць каштаваць 31 500 рублёў, горнага – 33 600.

У наяўнасці ёсць адзін горны веласіпед і тры дарожныя. Працуе Дом быту з 8:00 да 18:00. Выхадны дзень – субота, нядзеля.

Па тэлефоне суп­ра­цоў­ніца Дома быту адказала:

– Калі вы будзе браць ровар, вы адразу скажыце. Я папрашу, каб колы хоць надзьмулі.

Яшчэ ў Маладзечне працуюць некалькі прыватных фірмаў, якія таксама даюць ровары напракат.

МЯДЗЕЛ

У горадзе працуе пункт пракату веласіпедаў на базе Дома быту. Тут расказалі, што, хаця іх у наяўнасці аж 10 штук, попытам яны не карыстаюцца, таму што ў кожным санаторыі працуе свой пункт пракату. Але ўзяць напракат ровар можна што­дзённа, акрамя нядзелі.

ВІЛЕЙКА

У Вілейскім Доме быту ўзяць ровар напракат можна за 5 800 рублёў у суткі. Так, пракат  каштуе як палова буханкі хлеба.

Паездкі цягам месяца на вілейскім ровары абыдуцца вашаму бюджэту ў 79 600 рублёў.

Працуе Дом быту штодзень, акрамя нядзелі і панядзелка.

– Але попытам ровары, усё адно, не карыстаюцца, – адказалі ў Доме быту.

ВАЛОЖЫН

Сёлета пракату веласіпедаў у Валожыне няма. Суразмоўца з Валожынскага аддзела адукацыі патлумачыла, што “ровары былі, але хутка прыйшлі ў заняпад”. Іншых месцаў пракату ў горадзе мы не знайшлі.

СМАРГОНЬ

У Смаргоні на пытанне пра пракат ровараў адказалі:

– Ёсць толькі канькі, не трэба?

АШМЯНЫ. АСТРАВЕЦ

Пра пункты пракату ў гэтых гарадах “Рэгіянальнай газеце” дазнацца не ўдалося. Калі вы ведаеце яшчэ якія пункты пракату, раскажыце пра гэта іншым чытачам “Рэгіянальнай газеты”.