Дома 2 жніўня віляйчане сустракаліся з “Нёман-Агра”  са Стаўбцоўскага раёна і выйгралі 3:1.

– За кошт чаго ўдалося перарваць крыўдную серыю пройгрышаў? – спытаў у прадстаўніка “Віліі” Алега Гулевіча.

– Шэраг нашых гульцоў вярнуліся з адпачынку ці аднавіліся пасля траўмаў. Ды і сабраліся ўсе, сур’ёзна пагутарылі, што хопіць ужо прайграваць.

Напачатку першага тайма дамінавалі госці. І гол забілі першымі. А потым гульня ў віляйчан пайшла лепш, многае стала атрымлівацца – асабліва ў другім тайме. У ім віляйчане забілі тры галы: двойчы вызначыўся Аляксандр Грыхуцік, і адзін раз – Віктар Сяліцкі.

– Заўзятары падыходзілі пасля матчу, дзякавалі. Так ім спадабалася гульня нашай каманды ў другім тайме. Казалі: “Каб вы так заўжды гулялі, то маглі б і чэмпіёнамі быць”, – дзеліцца Алег.

 “Вілія” паднялася на пятае месца.  

У Чысці сустракаліся мясцовая Забудова-Буд” і ДЮСШ-4 з Маладзечна.  Гаспадары перайгралі маладзечанцаў 2:1. У іх галамі адзначыліся Працкевіч, Ахрамовіч, у маладзечанцаў – Альховік.

Нягледзячы на паражэнне, ДЮСШ-4 захавала трэцяе месца, каманда з Чысці ўзнялася на восьмае.