–  Расійская вакцына “Грыпол плюс” і па тэндары выйграла, і яе закупляюць многія прадпрыемствы для правядзення вакцынацыі сваіх супрацоўнікаў, –   зазначыла яна.

Паводле слоў Карабан, “Грыпол плюс” выкарыстоўваюць у Беларусі на працягу апошніх пяці гадоў, аднак яе высокая цана не дазваляла ёй выйграваць тэндар на масавую закупку вакцын. 

–  Сёлета была прапанаваная цана ніжэйшая, чым у кампаніі, якая пастаўляла кітайскую вакцыну (“Флюваксін”), якую мы выкарыстоўвалі з 2010 года, –   дадала спецыяліст.

Яна падкрэсліла, што “Грыпол плюс” адносіцца да субадзінкавых вакцын, якія ўтрымліваюць толькі паверхневыя бялкі, і “па мінімуме выклікае пабочныя рэакцыі”. Супрацьпаказаннямі для прымянення з’яўляюцца алергічныя рэакцыі на папярэдняе вакцынаванне супраць грыпу, а таксама алергія на курыны бялок, адтэрмінаваным супрацьпаказаннем –   вострыя фазы захворванняў.

Вакцынацыя супраць грыпу праводзіцца ў Беларусі ў кастрычніку-лістападзе.

Акрамя “Грыпола плюс” сёлета будуць даступныя вакцыны “Ваксігрып” (Францыя), “Інфлювак” (Нідэрланды), “Ультравак” (Расія), “Флюваксін” (Кітай). Кошт вакцынацыі для насельніцтва пакуль невядомы, але, паводле слоў Карабан, ён будзе не нашмат вышэйшы за леташні і складзе арыенціровачна ад 90 да 150 тысяч. 

Як зазначыла кіраўнік Нацыянальнага цэнтра па грыпе Рэспубліканскага навукова-практычнага цэнтра эпідэміялогіі і мікрабіялогіі Наталля Грыбкова, “Грыпол плюс” утрымлівае ў складзе імунамадулятар поліаксідоній. Паводле звестак расійскіх аўтараў, наяўнасць поліаксідонію ў гэтай вакцыне дазваляе ўзняць супраціўляльнасць арганізму да іншых рэспіраторных інфекцый, якія могуць нас праследаваць на працягу ўсяго эпідэмічнага сезону.

Акрамя таго, дадала Грыбкова, усе партыі вакцын, якія паступаюць у Беларусь, правяраюцца на бясшкоднасць.

“Наша Ніва” паводле БелаПАН.