25 верасня грамадскасць Беларусі будзе адзначаць 250 год з дня нараджэння Міхала Клеафаса Агінскага.

Адным з ініцыятараў і “рухавікоў” ідэі адра­джэння і ўшанавання памяці Агінскага ў Беларусі стаў заслужаны дзеяч культуры, кавалер ордэна Францішка Скарыны, дырэктар Маладзечанскага музычнага кале­джа Рыгор Сарока. Дзякуючы яго намаганням у 1995 годзе музычнаму каледжу прысвоілі імя кампазітара. У лістападзе 1995 года фасад каледжа ўпрыгожыла копія мемарыяльнай дошкі, прысвечанай Міхалу Клеафасу, а яе арыгінал у 1996 годзе ўсталявалі ў Фларэнцыі, на фасадзе дома, дзе кампазітар правёў свае апошнія гады.

1 верасня 2001 года дзякуючы намаганням Рыгора Сарокі і яго паплечнікаў на пляцоўцы перад уваходам у музкаледж усталявалі адзіны ў Беларусі помнік Агінскаму. Аўтарам абодвух твораў стаў скульптар Валяр’ян Янушкевіч.

Рыгор Сарока стаў ідэйным натхняльнікам стварэння першай нацыянальнай оперы, пры­свечанай асобе Міхала Клеафаса. Дзякуючы зладжанай працы кампазітара Алега Залётнева, лібрэтыста Сяргея Макарэя, сімфанічнага аркестра каледжа і яго кіраўніка, салістаў і змешанага хору ў 2013 годзе на сцэне Палаца культуры адбылася прэм’ера оперы “М.К. Агінскі. Невядомы партрэт”.

Рыгор Сарока

Рыгор Сарока

Ад 2012 года ў Мала­дзечне працуе дабрачынны фонд “Спадчына М.К. Агінскага”. З удзелам членаў фонду стварылі дакументальны фільм “Рана ў сэрцы. М.К. Агінскі” (рэжысёр Анастасія Мірашнічэнка), паставілі оперу Алега Залётнева і выдалі яе партытуру, перавыдалі буклет “Вяртанне” (аўтары Вольга Корсак і Вольга Царык), зладзілі музычнае турнэ “Музыка княжага роду Агінскіх”.

У межах святкавання юбілею вялікая работа вядзецца ў вёсцы Аборак, дзе нарадзіўся асабісты сакратар Агінскага Леанард Ходзька. Сіламі прадстаўнікоў фонду і супрацоўнікаў муз­кале­джа вычысцілі тэрыторыю, дзе знаходзіўся касцёл святога Роха, адрэстаўравалі крыж, зрабілі падмурак для малення, прывялі ў належны выгляд фамільны склеп Ходзькаў-Дэдэркаў, знайшлі камяні з імёнамі роду.

Да кастрычніка завершаць частку рэстаўрацыі: адновяць браму, паставяць агароджу, усталююць памятную дошку і камень на месцы, дзе стаяў дом Ходзькі.

За апошнія гады адбылося сапраўднае вяртанне Агінскага на Радзіму.

Падчас святкавання юбілею ў музкаледжы прой­дуць канцэрты, музычна-літаратурныя ве­ча­ры, навуковыя канферэнцыі, мультымедыйныя прэзентацыі, мастацкія выставы.