У музеі народнай славы 12 лютага ўрачыста адкрылі раздзел экспазіцыі “Выконваючы воінскі абавязак”. Прысвечаны ён воінам-інтэрнацыяналістам Мядзельшчыны.

Пераважна тым, якія ваявалі ў Афганістане. Але таксама можна даведацца, у якіх яшчэ краінах беларусы прымалі ўдзел у баявых дзеяннях.

Тут сабраная форма, узнагароды, вайсковы рыштунак, асабістыя рэчы.

Ёсць выкідны парашут, афганскія грошы, лістоўкі з заклікамі да афганскіх маджахедаў здавацца, што скідвалі з самалётаў. А ў цэнтры –  партрэт ураджэнца вёсцы Конціненты Івана Аніські, які загінуў у Афганістане.

Стварылі раздзел самі воіны-інтэрнацыяналісты.

Мікалай Калошка разам з іншымі працаваў над стварэннем раздзела.  Фота Алеся Высоцкага.

Мікалай Калошка разам з іншымі працаваў над стварэннем раздзела. Фота Алеся Высоцкага.

– Сам над ім разам з сябрамі па аб’яднанні працаваў, – кажа Мікалай Калошка з вёскі Чараўкі. – Тут і мае фатаграфіі ёсць. Абнавілі ўсё, цяпер цікавей.

– А што найбольш цікавае?

– Як нам, то тут усё цікавае.

Старшыня раённай арганізацыі грамадскага аб’яднання “Саюз ветэранаў вайны ў Афганістане” Юры Мяркулаў дзеліцца:

–  Зрабілі гэта для таго, каб пашырыць экспазіцыю для патрыятычнага выхавання моладзі. І народ, які прыязджае адпачываць на курорт, завітае ў музей, паглядзіць, што ў нас жывуць такія хлопцы – воіны-інтэрнацыяналісты.