“Пайшла як прыгажуня, як жанчына, а не як што-небудзь” Рэпартаж з рэпетыцыі конкурсу “Місіс Маладзечна”

Мы завіталі на рэпетыцыю амаль у 14.00. Удзельніцы танцавалі і не думалі спыняцца.

Арганізатар конкурсу Маргарыта Шытыка адразу папярэдзіла:

– Толькі не фатаграфуйце, захавайце інтрыгу, хай для гледачоў будзе сюрпрыз, якім чынам дзяўчаты з’явяцца на сцэне.

– Маргарыта, а за час рэпетыцый ці з’явіліся ў вас свае “любімчыкі”?

– Не, для мяне дзяўчаты ўсе аднолькавыя. Я за кожную перажываю як за сябе саму. І параду стараюся даць, і пакрычаць там, дзе трэба.

І Маргарыта Шытыка кіруе працэсам, як бы мовіць “ад душы”:

– Пайшла як прыгажуня, як жанчына, а не як што-небудзь…, дзяўчаты вы ўсміхаецеся надта таямніча, я аж баюся, – можна пачуць рэплікі Маргарыты на рэпетыцыі.

– Многа сіл у вас адбірае конкурс?

– Калі мяне пытаюцца пра тое, ці стамілася я, я адказваю: хутчэй бы наступіла вясна. Ва ўсіх сэнсах гэтага слова. ( Сам конкурс адбудзецца 1 сакавіка – “РГ”).

Танец удзельніцам конкурсу ставіць харэограф Юлія Філатава.

– Я да удзельніц стаўлюся з разуменнем.  Я разумею, як ім цяжка, многія ж да гэтага ні разу не танцавалі. Але галоўнае ж у танцы –  паказаць свой унутраны свет. Энергетыку сваю данесці да публікі. Можна ж і памыліцца, але калі гэта ззяе знутры, калі настрой бачны ў поглядзе, жэсце, усмешцы, паверце, гэта ўжо многа.

Нарэшце абвяшчаюць перапынак.

Патэнцыйныя місіс бягуць да сваіх месцаў, здымаюць туфлі на абцасах, пераабуваюцца ў зручны абутак.

Хтосьці закінуўшы ногі дагары, адпачывае. Іншыя дзяўчаты дастаюць прысмакі і частуюць імі сваіх саперніц, арганізатараў, гукарэжысёра, карэспандэнтаў “РГ”.

Юлія Гірза напякла вафляў, Ульяна Макавец частавала ўсіх цукеркамі.

Некаторыя ўдзельніцы не адпачываюць і за кулісамі паўтараюць рухі, якія не атрымоўваюцца.

У перапынку мы гутарым з некаторымі ўдзельніцамі:

Таццяна Янкоўская прызналася, што гэты конкурс у яе дарослым жыцці першы. Аднойчы ўдзельнічала ў конкурсе “Міс”, але гэта было ў 10 класе.

–  Я люблю такія конкурсы. Раней займалася ў мадэльным агентстве, таму сцэны не баюся. Але шмат сілаў у гэтым конкурсе забірае візітка. Ну як за 3-4 хвіліны расказаць пра сябе, каб усім было цікава?

– Ці дорага ўдзельнічаць у конкурсе “Місіс Маладзечна”?

– Я б не сказала, што гэта вымагае шмат грошай. Ёсць жа сябры, якія дапамогуць і з сукенкай, і з макіяжам.

– А іншыя ўдзельніцы – гэта саперніцы ці сяброўкі?

– Я б сказала, што нейкая доля суперніцтва ўсё ж ёсць. Так, як і ёсць некаторыя фаварыты, якія, на маю думку, увойдуць у лік фіналістак. Але хто гэта, я вам не скажу.

Надзея Тугусову падбілі  на ўдзел аднакласніцы.

– На вечары сустрэчы выпускнікоў яны спыталіся ў мяне, чаму я да гэтага часу не падала заяўку. Ну так і вырашылі дэлегаваць мяне. Затое на конкурсе ў мяне будзе самая вялікая група падтрымкі. І ў падрыхтоўцы да конкурсу таксама вельмі дапамагалі сяброўкі.

– Як муж паставіўся да вашага ўдзелу ў конкурсе?

– Сказаў, што пацерпіць адсутнасць прасаваных кашуль толькі да 1 сакавіка. А калі шчыра, ніхто ж не адмяняў клопаты па доме. Даводзіцца сумяшчаць рэпетыцыі і дом. 

Іна Цярэшка пагадзілася паразмаўляць толькі пасля таго, як перакусіла:

– Вось цяпер я задаволеная і магу гаварыць/

– Хіба місіс можна есці?

– А як жа. І чым смачней і больш каларыйна, тым лепш. Галодная жанчына – гэта жанчына ў дэпрэсіі.

– Ці шмат высілкаў патрабуе ўдзел у такім конкурсе?

– Любая падрыхтоўка да любога конкурсу вымагае шмат сілаў. Ды і наогул, жанчына ўстае раніцай і пачынае думаць пра што? Пра тое, што ёй сёння апрануць. А тут конкурс. Вядома, прадумваецца кожны выхад, кожны вобраз. Трэба разумець, што ёсць туфлі для жыцця і туфлі для сцэны.

– Хто дапамагае вам у падрыхтоўцы?

– Сям’я. З сям’і ўсё пачынаецца. Мне вельмі важна знаць, што мы ўсе падтрымліваем адзін аднаго. У мяне дзве дачкі. Старэйшай 12 гадоў, малодшай – 8. І яны ўжо даюць свае парады.

Адзін з конкурсаў будзе як раз выхад з дзецьмі.

На сцэну з 14 мамамі-удзельніцамі выйдуць 28 іх дзяцей.

З Таццянай Калядой на сцэну выйдуць чацвёра яе дзяцей.

– Як вы паспяваеце і ў конкурсе ўдзельнічаць і чатырох дзяцей даглядаць?

– Ну я не скажу, што нечым ахвяравала, пагадзіўшыся на ўдзел у гэтым конкурсе. Насамрэч, гэта такі кайф. Я сама работнік культуры і ведаю, як арганізаваць такі конкурс, а вось удзельнічаю упершыню. І гэта больш цяжка. Мандраж усё ж такі прысутнічае.

Самая галоўная інтрыга конкурсу для саміх удзельніц, гэта хто ж усё ж такі ўвойдзе ў журы.

– Пяцёра годных мужчын, – адказвае Маргарыта Шытыка. – Гэта ўсё, што вам трэба ведаць.

­– Маргарыта, ну скажы, а то заказычым, – жартуюць будучыя місіс.

Рэпетыцыя працягваецца. І хаця на гадзінніку ўжо амаль пяць вечара, ніхто не спяшаецца разыходзіцца. Яшчэ столькі трэба паспець да 18.00 першага сакавіка.