Самая папулярная машына ў Вілейцы – ВАЗ, а ў Маладзечне?

Калі і вы чуеце, што нехта абураецца тым, што машын стала вельмі шмат або ездзяць адны “Фольксвагены”, дзякуючы Маладзечанскай ДАІ і “Рэгіянальнай газеце” можаце цяпер апераваць дакладнымі лічбамі.

У 2016 годзе ў Маладзечне зарэгістравана  больш за 44 000 транcпартных сродкаў.

Аўтобусаў па горадзе ездзіць 450, грузавікоў – больш за 4 500, легкавых аўтамабіляў – 33 500.

І гэта дадзеныя толькі па горадзе. А дадайце сюды 18 тысяч транспартных сродкаў, якія зарэгістраваныя ў раёне. З іх аўтобусаў – 140, грузавікоў – 2 200, легкавых машын – 12 800.

Астатнія транспартныя сродкі – гэта мотатэхніка і прычэпы.

А ўявіце сабе, што  было б, каб гэтыя машыны сабраць у адным месцы?

Па Вілейскім раёне ездзяць 230 аўтобусаў, 2 600 грузавікоў і 16 500 легкавушак. Агульная колькасць транспартных сродкаў у Вілейскім раёне – 23 600.

На 5 500 транспартных сродкаў менш у Валожынскім раёне – 18 000.

Аўтобусаў з іх – 200, грузавых аўто – 2 300, а легкавых аўтамабіляў – 12 000.

У Мядзельскім раёне транспартных сродкаў толькі на адну сотню болей, чым у Валожынскім.

170 аўтобусаў, 1 700 грузавых і 10 300 легкавых машын складаюць аўтапарк раёна.

Што датычыцца самых папулярных марак аўто, то ў Маладзечне больш за ўсё “Фольквагенаў” – 4 015 машын, а ў Вілейцы самае папулярнае аўто – ВАЗ. Іх у раёне 1 496. Той жа ВАЗ самы папулярны і ў Валожыне – 752 машыны, і ў Мядзеле – 518.

Прызнайцеся, ці часта вам выпадае апошнім часам бачыць на даро­гах старыя, добрыя, шумныя “Запарожцы”? А між тым іх вось колькі:

Маладзечна – 1 205, Вілейка – 415, Валожын – 170 і у Мядзеле іх – 110.

Папрасілі ў ДАІ даведацца, колькі ў чатырох раёнах зарэгістравана дарагіх машын: “Бугаці”, “Мазэраці”, “Бэйнтлі”, “Ролс-Ройсаў”. Адказ быў лаканічным, як ніколі, – ноль.