Дзякуючы намаганням маладзечанца Вячаслава Курбакі, якога чытачы “РГ” ведаюць як Пан Шыманскі, мы атрымалі магчымасць згуляць у віртуальны хакей па-беларуску.

Як растлумачыў аўтар, ідэя стварыць беларускамоўны патч, ці абнаўленне да НХЛ 09 з’явілася даўно. Справа ў тым, што карпарацыя EASPORTS, што займаецца распрацоўкай віртуальнага дадатку НХЛ ад 2009 года, адмовілася ад выпуску яго на платформе персанальных камп’ютараў і ўсе выпушчаныя версіі НХЛ, пачынаючы з НХЛ 10 да НХЛ 16, можна выкарыстаць толькі на гульнявых кансолях PS і X-BOX.

Такім чынам, большасць аматараў дадзенага сімулятара апынулася адарванай ад навінак сусветнага хакейнага кібер-асяроддзя. Але гэта дало вялікі штуршок для мадыфікатараў, якія з новымі сіламі ўзяліся за працэс стварэння графічных і рознага роду іншых абнаўленняў і дадаткаў да сімулятара НХЛ 09. За гэты час створаныя чэшскія, славацкія, нямецкія, швейцарскія, фінскія і іншыя мадыфікатары да дадзенага сімулятара, а расійскі патч РХЛ-mod увогуле можна лічыць класікай жанру і самым графічна дасканалым дадаткам да НХЛ 09.

Стала крыху крыў­дна, што краіна, у якой хакею надзяляецца столькі ўвагі і падтрымкі, застаецца без версіі сімулятара на роднай мове. Для стварэння першага беларускамоў­нага патча “НХЛ 15 (MaHaBLRpatch)” Вячаславу Курбаку спатрэбілася вывучыць некалькі камп’ютарных праграм, прааналізаваць шмат рознага роду матэрыялу, перакласці каля дзевяці тысяч рускамоўных сказаў і праз некалькі месяцаў працы патч быў гатовы.

Фота забяспечанае Вячаславам Курбакам.

Фота забяспечанае Вячаславам Курбакам.

Чым жа адметны гэты патч акрамя беларускамоўнага інтэрфэйса? У дадзенай зборцы вас чакаюць: Беларуская экстраліга, Чэмпіянат свету па хакеі, які ўключае ўсе 50 зборных з рэйтынгу IIHF, турнір хакейнай Лігі чэмпіёнаў і магчымасць стварыць сваю каманду з любога горада краіны ад Пінска да Радашкавічаў. Парадуе аматараў беларускай альтэрнатыўнай музыкі і саў­нтрэк да гульні, які налічвае 13 песень ад беларускіх гуртоў розных накірункаў.

Беларускія кібер-энтузіясты распрацоў­ваюць праект “БХЛ 16”, што будзе ўключаць самыя апошнія абнаўленні, што закранулі беларускі хакей. Таму ўжо цяпер можна казаць, што не за гарамі выхад і другой часткі першага беларускамоўнага патча MaHaBLRpatch 2.0.

Спампаваць жа першы беларускамоўны патч НХЛ 15 (MaHaBLRpatch) можна ў суполцы Вконтакте “Малады Хакей”, а таксама і азнаёміцца з правіламі па ўсталёўцы дадзенага дадатку да сусветнавядомай гульні.