Ад 7 да 11 чэрвеня ў Мінску праходзіла 26-я Міжнародная спецыялізаваная выстава “Бел­агра”. У ёй прынялі ўдзел больш за 500 кампаній аграпрамысловага накірунку з 23 краін свету, сярод іх Расія, Поль­шча, Літва, Латвія, Украіна і іншыя.

Удзельнікі выставы маглі пазнаёміцца з сучаснымі накірункамі ў галіне раслінаводства, жывёла- і птушкагадоўлі, тэхналогіямі перапрацоўкі, упакоўкі і захоўвання прадукцыі, разнастайнасцю сельскагаспадарчай тэхнікі.

У рамках выставы асобныя кампаніі арганізоўвалі прэзентацыі. 8 чэрвеня прайшла прэс-канферэнцыя праекта “Густы Еўропы – якасць і традыцыя”.

Праект накіраваны на прасоўванне прадукцыі харчовай прамысловасці з краін Еўрапейскага саюза. Ён будзе рэалізоўвацца на працягу трох гадоў – 2015-2018. Прэзентавалі яго прадстаўнікі польскіх кампаній мясных і кілбасных вырабаў, вытворцы садавіны і гародніны.

Асноўная мэта поль­скіх кампаній – доўгатэрміновае супрацоўніцтва з Беларуссю па рэалізацыі разнастайнай прадукцыі, абмен досведам у тэхнічным плане. Сярод прадукцыі, якую плануюць рэалізоўваць: шматлікія сарты яблыкаў, груш, сліў, чарнаплодная рабіна, таматы, цыбуля, буракі, морква. А таксама сокі і мясныя вырабы.

Фота oboi-na-stol.com.

Фота oboi-na-stol.com.

Польшча хоча падзяліцца досведам, як зрабіць працу ў вёсцы сучаснай

Прадстаўнікі поль­скіх кампаній адзначылі, што іх вёскі нашмат змяніліся за апошні час, павялічыўся прафесіяналізм гаспадароў, у гаспадарках выкарыстоўваецца сучасная тэхніка. Гэтыя складнікі і зрабілі вытворчасць сучаснай, а прадукцыю – высакаякаснай. Таму Польшча хоча падзяліцца сваімі дасягненнямі з Беларуссю, каб спрыяць далейшаму развіццю ў галінах мясаперапрацоўкі і садоўніцтва. У перспектыве гэта можа развіцца ў сумесныя міжнародныя прадпрыемствы, выгадныя для абедзвюх краін.

Каб упэўніваць не толькі аргументамі і лічбамі ў якасці прадукцыі, арганізатары прапанавалі ўзяць яе на зуб. Былі стравы з мяса: кілбасы, выразкі, вяндліна; а таксама садавіна, сярод якой гонар і неафіцыйны  сімвал Польшчы – яблык.

Яблык – неафіцыйны сімвал Польшчы. Фота justlady.ru.

Яблык – неафіцыйны сімвал Польшчы. Фота justlady.ru.

Смачна – ацаніла поль­скія мяса і кілбасы і карэспандэнтка “РГ”.

Натуральная, таму і смачная

Пакуль удзельнікі каштавалі разнастайныя стравы і  абменьваліся меркаваннямі на гэты конт, прадстаўнікі мясной прадукцыі з гонарам адзначалі: натуральная, таму і смачная.

Кіраўнік польскага саюза жывёлаводаў і вытворцаў мясной буйной рагатай скаціны Багуслаў Рогусь адзначае ў дачыненні да ялавічыны, што “дзякуючы сістэме вырошчвання жывёлы, асноўны рацыён якой складаецца з натуральных кармоў і харчавання на пашы, мы атрымліваем высакаякасны і бяспечны харчовы прадукт”.

“Новая прадукцыя заўсёды цікавіць пакупнікоў”

Маркетолаг мясаперапрацоўчай кампаніі “Вялес-Міт” Ігар Полудзень ацаніў, ці ёсць шансы ў польскага мяса і кілбас заняць лідзіруючыя пазіцыі на беларускім рынку.

– У любым выпадку, калі на прылаўках магазінаў з’явіцца новая прадукцыя, то можна лічыць, што ў нашага і іншых мясаперапрацоўчых прадпрыемстваў з’явіцца дадатковы канкурэнт, – разважае спецыяліст. – Новае заўсёды выклікае цікавасць у пакупнікоў. Аднак з іншага боку – гэта штуршок прадпрыемствам рабіць прадукцыю лепшай, каб задаволіць патрабаванні пакупніка.

Як адзначае Ігар Полудзень, прадукцыя кампаніі “Вялес-Міт” прыйшлася пакупнікам даспадобы не толькі смакам, аднак і якасцю.
– Мясныя вырабы нашага прадпрыемства атрымліваюць належныя сертыфікаты, праходзяць лабараторныя даследаванні, прадпрыемства пільна сочаць за якасцю, – расказвае спецыяліст. – За якасцю пільна сочыць і само кіраўніцтва – штодзень праходзяць дэгустацыі прадукцыі, перш чым трапіць на прылаўкі магазінаў, а ў далейшым у халадзільнікі пакупнікоў.

Тым больш прадпрыемства можа пахваліцца не толькі якасцю, але і багаццем асартыменту. На мясакамбінаце “Вялес-Міт” выпускаюць 50 відаў разнастайных мясных вырабаў. Сярод іх 20 відаў сыравэнджанай кілбасы, 13 – варанавэнджанай, 15 – варанай, а таксама сасіскі, вырабы са шпіку, з субпрадуктаў, паўфабрыкатаў.

– Разнастайнасць нашай прадукцыі сведчыць пра тое, што мы можам задаволіць любыя густы нашых пакупнікоў, – заўважае спецыяліст. – А значыць, зможам канкурыраваць з іншымі мясаперапрацоўчымі прадпрыемствамі, у тым ліку і з іншых краін.
Сучаснае абсталяванне  на прадпрыемстве дазваляе рабіць прадукцыю высокай якасці.

Топ-5 парад, як правільна гатаваць і выбіраць мяса

Фота xcook.info.

Фота xcook.info.

Парады прыво­дзяцца паводле кнігі “Густы Еўропы – якасць і традыцыя”, якую прэзентавалі гасцям прэс-канферэнцыі.

1. Высакаякасная ялавічына адрозніваецца крыва-чырвоным колерам. Выключэнне – мяса ў вакуумнай упакоўцы, якое без кіслароду змяняе колер на цёмна-чырвоны, аднак, калі мяса дастаць з упакоўкі, натуральны колер аднаўляецца.

2. Белыя праслойкі ў ялавічыне сведчаць пра тое, што мяса маладое. Жоўтыя – пра тое, што мяса ўзятае з тушы старой жывёлы.

3. Валокны ялавічыны дастаткова трывалыя, таму сырое мяса неабходна рэзаць упоперак валокан, інакш пасля цеплавой апрацоўкі яго цяжка будзе укусіць.

4. Мяккасць і сакавітасць ялавічыны можна захаваць, калі размарожваць яе паступова. Паколькі маруднае размарожванне папярэджвае ўцечку плазмы, сокі застаюцца ў клетках, а мяса такім чынам захоўвае смак.

5. Каларыйнасць свініны можна зменшыць, калі выбіраць адпаведны спосаб прыгатавання. Свініну можна прыгатаваць у гаршчочку для запякання без тлушчу альбо на электрычным грылі. Замест высокакаларыйных со­у­саў можна выкарыстоўваць гародніну, прыгатаваную на пары, альбо салату з гародніны. Дзякуючы гэтаму свініна не будзе такой каларыйнай і лягчэй засвоіцца арганізмам.