Цэнтральная раённая бібліятэка імя Максіма Багдановіча разам з “Рэгіянальнай газетай” і курсамі беларускай мовы “Мова нанова” абвяшчае конкурс “Адкрый для сябе беларускую кнігу ”.

Мы запрашаем вас цягам трох месяцаў, ад 10 чэрвеня да 31 жніўня, завітаць на абанемент цэнтральнай бібліятэкі і браць для чытання беларускія кнігі ці часопісы.

Лепшых кнігалюбаў чакаюць каштоўныя падарункі.

Пераможцаў конкурсу вызначае журы з прадстаўнікоў бібліятэкі, курсаў “Мова нанова” і “РГ”. Будуць тры прызавыя месцы.

Пераможцамі стануць удзельнікі, якія прачыталі найбольшую колькасць беларускамоўных друкаваных кніг і часопісаў.

Чытачоў кніг на замежных мовах чакаюць падарункі

Супрацоўнікі залы літаратуры на замежных мовах цэнтральнай раённай бібліятэкі праводзяць конкурс “Лета з кнігай”.

Школьнікі, якія хочуць павысіць свой узровень ведання замежных моў, могуць усё лета чытаць кнігі на англійскай, нямецкай, французскай, іспанскай і польскай мовах.

Для кожнага чытача завядуць спецыяльны фармуляр. За пяць прачытаных кніг школьнікаў чакае прыз.

У канцы лета падвядуць вынікі конкурсу і абяруць самых актыўных чытачоў. Яны атрымаюць падарункі на ўрачыстым свяце кнігі на пачатку верасня.