Што рабіць, каб у спёку не атрымаць цеплавы ўдар і добра сябе адчуваць? Медыкі раяць піць ваду, есці садавіну і гародніну і насіць свабодную вопратку.

Вопратка павінна быць з натуральнай тканіны і свабодная, каб праз яе праходзіла паветра. Апранайце адзенне светлых колераў. Абавязкова насіце галаўны ўбор, таксама светлага колеру. Ва ўсіх людзей з сабой мусіць быць бутэлька пітной негазаванай вады. Піць трэба не халодную ваду, а пакаёвай тэмпературы. Лепей не ахалоджваць яе ў лядоўні, дае парады лекар-валеолаг гарадскога цэнтра здароўя Анастасія Косава.

Што яшчэ трэба рабіць у спёку, каб зберагчы здароўе:

– Трэба есці, у рацыёне мусіць быць садавіна і гародніна.

– Не трэба перабольшваць з кандыцыянерам, не менш за 22-24 градусы.

– Можна абмываць рукі, галаву, ахалоджваць ногі ў прахалоднай вадзе, рабіць кампрэсы.

– На ровары лепш ездзіць у цені.

– Спортам займацца можна, але ў памяшканні з кандыцыянерам, нагрузкі трэба паменшыць.

Што нельга:

– Ужываць спіртныя напоі.

– З’ядаць шмат марожанага, бо можна зарабіць ангіну ад перападаў тэмпературы

– Ужываць вельмі халодную і газаваную ваду. Ад халоднай вады таксама можна прастудзіцца, а мінеральная вада утрымлівае солі, якія перагружаюць сардэчна-сасудзістую сістэму.

Калі ў спёку вы заўважылі, што чалавеку дрэнна, то яго трэба перамясціць у цень і даць падыхаць свежым паветрам.

Трэба даць доступ да кіслароду, пажадана чалавека пакласці, прыпадняць яму ногі, каб даць адток крыві да сэрца. Калі чалавек у прытомнасці, то варта даць папіць яму вады. Калі яму не становіцца лепш, то трэба выклікаць хуткую, – дадае Анастасія Косава.

Паводле “Нашай Нівы”.