На канцэрце Дзмітрыя Рудыка ў Вілейцы танцавала ўся плошча (Фота)

Свята панавала ў горадзе ўвесь дзень: былі і ўрачыстасці, і забавы.

А вечарам цэнтральная плошча сабрала віляйчан на канцэрт маладзечанца Дзмітрыя Рудыка, які ў апошнія выхадныя чэрвеня стаў пераможцам рэаліці-шоу “Народны шансон”.

– Гуляў увесь горад, уся плошча танцавала, проста перад сцэнай! – захоплена распавядае Дзмітры. – Вілейка – нібы асобная краіна, у якой людзі нязмушаныя і адкрытыя.

Па ацэнках Дзмітрыя, на канцэрце, які пачаўся ў 22 гадзіны, было каля трох тысяч чалавек. За дзве з паловай гадзіны віляйчане пачулі 30 песень. Удалы дуэт Дзмітрыя з дырэктарам вілейскага Палаца культуры Алесяй Высоцкай прыйшоў даспадобы гледачам.

– Надвор’е было проста шыкоўнае, віляйчане паглядзелі прагноз, перш чым планаваць дату свята, – узгадвае спявак. – Выконвалі старыя і новыя хіты, а калі я заспяваў песню “Ах, Вілейка, жамчужына ля мора…” – як усе танцавалі! Мора пазітыву!

На саксафоне Дзмітрыю акампаніраваў выкладчык дзіцячай школы мастацтваў з Маладзечна Аляксандр Ярмоленка:

– Такі таленавіты, на ляту ўсё схоплівае, – заў­важае Дзмітры пра ігру музыканта.

Канцэртам свята для віляйчан не закончылася. Спачатку ўсе атрымалі асалоду ад салюта, а пасля працягвалі весяліцца на дыскатэцы, якую зладзілі таксама на цэнтральнай плошчы.

Канцэрт у Маладзечне, які планавалі правесці 3 ліпеня на прыступках кінатэатра, давялося перанесці пакуль на нявызначаны дзень. Прычынай стаў моцны ­дождж.