Прафесар Адам Мальдзіс дэманстратыўна адмовіцца ад звання ганаровага грамадзяніна Астраўца, калі ў горадзе зрэжуць старыя дубы.

Навуковец распавёў карэспандэнтам “Рэгіянальнай газеты”, што дубы для Астравеччыны дрэвы асаблівыя:

Вы не задумваліся, чаму дуб намаляваны на гербе Астраўца? Бо гэтае дрэва сімвал каралеўскай улады. Дубы садзілі ў важныя гістарычныя моманты.

Па словах прафесара, дарогу, што вяла з Вільні ў Астравец, называлі каралеўскай, і ўздоўж яе садзілі дубы. А яшчэ сам кароль Жыгімонт загадаў пабудаваць на каралеўскай дарозе карчму. Чаму? У Астравец, упэўнены Мальдзіс, кароль ездзіў даволі часта.

Вось чаму ні ў адным мястэчку і горадзе Беларусі, лічыць прафесар, няма столькі дубоў.

Тут працаваў Францыск Скарына. Тут стваралася першая беларуская Канстытуцыя Статут 1529 года.

Адам Мальдзіс добра паямятае тыя дубы, што раслі ля маёнтка віленскага ваяводы Альбрэхта Гаштаўта:

Хлопцам я кожны дзень хадзіў ля гэтых старых раскідзістых дубоў у школу. Праўда, у той час яшчэ не ўсведамляў іх гістарычный каштоўнасці для Астраўца і для Беларусі ўвогуле.

Тыя, хто прыняў рашэнне зразаць дубы, абсалютна не ведаюць гісторыі, упэўнены Адам Мальдзіс.

Некалі прафесару Мальдзісу прысвоілі званне ганаровага грамадзяніна Астраўца. Але адпаведны дакумент так і не ўручылі, бо тады якраз мяняўся старшыня райвыканкама.

– Калі ў Астраўцы ссякуць дубы, я не буду забіраць тыя дакументы і дэманстратыўна адмоўлюся ад звання, –  заявіў Адам Мальдзіс.