– Выбар класа злучэнняў не выпадковы. Справа ў тым, што многія амінаізатыязолы дэманструюць шырокі спектр фармакалагічнай і біялагічнай актыўнасці. Таму мы выказалі здагадку, што злучэнні гэтага класа з належнымі хімічнымі групамі могуць праяўляць супрацьракавую актыўнасць, – распавядае Аляксандр Кісялёў з Маскоўскага фізтэха ў Даўгапрудным, чые словы прыводзіць прэс-служба МФТІ.
Хіміятэрапія, пры дапамозе якой дактары знішчаюць пухліны, працуе двума шляхамі – або пашкоджваючы ДНК ракавых клетак, прымушаючы іх самаліквідавацца, або перашкаджаючы іх росту і дзяленню. Другі спосаб сёння становіцца ўсё больш папулярным, бо ён не прыводзіць да з’яўлення яшчэ больш агрэсіўных відаў ракавых клетак з-за развіцця новых мутацый у іх геноме.
Прэпараты гэтага тыпу, так званыя антымітотыкі, разбураюць тубулін – адзін з базавых бялкоў клетак, крытычна важны для дзялення.
Падобныя рэчывы былі атрыманыя як сінтэтычным шляхам, так і знойдзены ў тканках трапічных раслін. Акрамя таго, нядаўна навукоўцы з МФТІ знайшлі “нарыхтоўкі” для антымітотыкаў у пятрушцы і кропе.
У сваёй рабоце навукоўцы апісалі новы метад сінтэзу малекул, які дазваляе досыць хутка і танна атрымліваць супрацьракавыя лекі. Выкарыстоўваючы гэтую методыку, хімікі з Расіі і іх замежныя калегі сабралі тры дзясяткі варыянтаў падобных прэпаратаў, эфектыўнасць якіх яны праверылі, паспрабаваўшы знішчыць культуры ракавых клетак і зародкі марскіх вожыкаў.
Як паказалі эксперыменты, даданне да падобнай малекулы двух новых вуглевадародных “кольцаў”, якія ўтрымліваюць у сабе атамы кіслароду і серы, прыкметна павысіла яе актыўнасць і “навучыла” яе спыняць працэсы дзялення нават у тых ракавых клетках, на якія не дзейнічае звычайная хіміятэрапія.
Дзесяць іншых рэчываў таксама прадэманстравалі высокі ўзровень актыўнасці і могуць выкарыстоўвацца для барацьбы з ракам.
У далейшым навукоўцы збіраюцца вывучыць тое, як пабудаванае гэта рэчыва і як яно злучаецца з мікратрубачкамі ўнутры клетак, якія дзеляцца, і разбурае іх. Такія веды дапамогуць палепшыць ўласцівасці лекаў і дазволяць стварыць іх аналагі, якія адрозніваюцца ад іх па структуры і “баявых” характарыстыках.
Паводле “Нашай Нівы”.
