Напярэдадні 8 Сакавіка мы сустрэліся з псіхолагам Анжэлай Клінцэвіч, каб пагутарыць пра тое, як зразумець мужчыну і якія наступствы могуць мець стэрэатыпы, у якія мы верым.

Анжэла Клінцэвіч працуе псіхолагам аддзялення сацыяльнай адаптацыі і рэабілітацыі маладзечанскага тэрытарыяльнага цэнтра сацыяльнага абслугоўвання насельніцтва. Расказала, што да яе звяртаецца шмат жанчын, у якіх узнікаюць праблемы ў асабістых адносінах.

– А ўсё таму, што жанчыны забываюцца пра тое, што, каб жыць са сваім мужам у згодзе, ёй трэба забяспечыць яму ўсяго пяць базавых патрэбаў.

1. Шлях да сэрца мужчыны ляжыць праз страўнік.

– І гэта зусім не стэрэатып. Насамрэч, каб мужчына не думаў пра палюбоўніц, у якіх хораша, спакойна і сыта, усё гэта павінна быць у яго дома.

Мужчыны імкнуцца да таго, каб ім заўсёды было што з’есці, дзе адпачыць, мець сваё жыллё, хвалююцца пра ўласнае здароўе, жадаюць пазбегнуць болю.

– Чаму мужчына часам не сыходзіць ад нелюбімай жонкі да жаданай палюбоўніцы? Ды таму, што ўтульнасць ён цэніць больш. Ці чаму ён, наадварот, збягае з дому, дзе яго ўвесь час “пілуюць”? Ды таму, што мужчына хоча цішыні і адпачынку ў сябе дома.

2. Мужчына імкнецца да таго, каб быць упэўненым у заўтрашнім дні, хоча бяспекі для сябе і сваёй сям’і.

3. Мужчына павінны адчуваць сябе сваім у кампаніі аднадумцаў: сярод заўзятараў, аўта­аматараў, паляўнічых, рыбакоў.

– Дайце яму свабоды ў яго захапленні. Мужчына вам аддзячыць, вось убачыце.

4. Не толькі жанчыны чакаюць, што блізкія заў­важаць іх новую прычоску або пахваляць смачна згатаваны абед. Мужчыны яшчэ больш чакаюць прызнання сваіх талентаў, чым жанчыны.

– Хваліце свайго мужчыну! За тое, як ён забіў цвік, за тое, як ён кіруе машынай, за тое, як ён смачна пахне.

5. Мужчына хоча самарэалізацыі. А рухавік прагрэсу – гэта, як вядома, жанчына.

Дапамажыце свайму мужчыну (ды і сабе заадно) выбраць занятак, які будзе ўносіць разнастайнасць у жыццё.

– Прапануйце свайму мужчыну разам пайсці ў спартыўную залу, навучыцца фатаграфаваць, паспрабаваць свае сілы ў лацінскіх танцах. Вось убачыце, наколькі зменяцца вашы адносіны, калі мужчына будзе бачыць у вас не толькі спадарожніцу, але і сваю музу.

“Сцерпіцца – злюбіцца”… але якімі сродкамі

Анжэла Клінцэвіч усё ж перасцерагла, што пры ўсім жаданні дага­дзіць свайму спадарожніку, не трэба забывацца пра сябе.

– О, жанчыны любяць ахвяраваць сабой. Паверце, гэтага ніхто не ацэніць. Па-першае, трэба любіць сябе, жыць з сабой у згодзе. Да мяне на кансультацыю прыходзіла жанчына, якая скардзілася на тое, што ў яе першы муж алкаголік, другі – таксама. А яна ўвесь час іх ратуе. Канешне, у гэтай маёй кліенткі ўжо склалася мадэль паводзінаў, яна і не ўяўляе, што бываюць іншыя мужчыны, але самае страшнае, калі даводзіцца чуць: “Сцерпіцца – злюбіцца, затое я замужам, каб суседзі не гаварылі”.

Думаць так, кажа псіхолаг, гэта прамы шлях да захворванняў, таму што жанчына ўвесь час жыве ў стане стрэсу.

– Адсюль і сардэчна-сасудзістыя захворванні. А мужчыны хварэюць на сэрца і таму, што мамы ім у дзяцінстве гаварылі “Не плач, ты ж мужчына”. Вось яны і трымаюць усё ў сабе. А потым паміраюць заў­часна, таму што сэрца не вытрымала.

Раіць Анжэла Клінцэвіч адмовіцца і ад стэрэатыпнага выразу: “Не мужчынская гэта справа”.

– Патрыярхальныя замашкі даўно трэба пакінуць у 19 стагоддзі.

 Гэта тады мужчыну называлі “грошапрыношчык”. А цяпер жанчына, акрамя таго, што працуе на рабоце, прыходзіць дадому і становіцца да пліты, да праса, займаецца з дзецьмі. Прыборка, прыгатаванне ежы, догляд за дзецьмі – гэта проста работа, якую па сілах выканаць і вашаму ненагляднаму.

Парады зразумелыя і простыя, але калі ў вас засталіся канкрэтныя пытанні або вам патрэбная індывідуальная кансультацыя, званіце на тэлефон даверу: 8-0176-74-66-20. Тэлефон працуе ў будныя дні з 8:00 да 17:00.

– І яшчэ адна парада жанчынам, – падсумоўвае Анжэла Клінцэвіч, – не спяшайцеся давяраць праблемы сваім сяброўкам, лепш даверце псіхолагу. Па-першае, мы не спытаемся ні ваша імя, ні месца працы і жыхарства, а па-другое, усё, што вы раскажаце, застанецца ў кабінеце псіхолага, а не пачне ў выглядзе плётак даходзіць да вас з вуснаў іншых сябровак. Ну, і дыхайце глыбей, яно дапамагае, – усміхаецца Анжэла Клінцэвіч.