Дом №1 на вуліцы Машэрава называюць самым прыгожым у горадзе. 

Яшчэ б! Вялізныя вокны на ўсю сцяну, якія выходзяць на гарадскі парк. У такім доме жыць – адно задавальненне.

Чаму мы так упэўнена пра гэта кажам, таму што пазнаёміліся з Анастасіяй.  Яна жыве на першым паверсе ў новым доме і расказала “Рэгіянальнай газеце”, хто зайшоў у новую кватэру першым, што падарыў забудоўшчык і пра што марыць маладая гаспадыня сваёй уласнай кватэры.

– У кватэру першай зайшла я! – кажа гаспадыня аднапакаёвай кватэры. – У прыкметы я не веру, таму асабліва з пошукам ката не замарочвалася.

Анастасія купіла кватэру летась у снежні, а ўваходзіны адзначылі  ў студзені.

– Для аднапакаёвай кватэры наша даволі вялікая: 45,5 квадратнага метра. Кухня вялікая, пакой прасторны.

Дзяўчына прызнаецца, што калі дом толькі пачаў будавацца, жыць у ім здавалася нязбыўнай марай.

– Думалі, што кватэры тут будуць каштаваць касмічна, але калі даведаліся пра кошт, вырашылі, што хочам жыць у новым доме, дзе ўсё новенькае. 

Насця кажа, што не адна яна рада, што жыве ў гэтым доме.

– У нас і суседзі, відаць па усім, вельмі рады таму, што яны гаспадары кватэры менавіта ў гэтым доме, бо ўсе вітаюцца, усміхаюцца адзін аднаму.

Хаця суседзяў у іх пакуль няшмат.

– Або кватэры яшчэ не прададзеныя, або папросту яшчэ засяліцца не паспелі. Аднак і перфаратары па выхадных не будзяць. У кватэрах добрая шумаізаляцыя.

Калі падняць галаву ўгору і звярнуць увагу на балконы, становіцца зразумела, што аддзелачныя работы ў многіх яшчэ ў самым разгары. Тут, на балконах, стаяць будаўнічыя сумесі, ляжаць шпалеры, клей.

– У кватэры нічога не было. Толькі ў падарунак ад забудоўшчыка стаяла газавая пліта. І ўнітаз. Рамонт мы задумалі грандыёзны. Таму не адразу атрымалася заехаць.

Першае, што купілі ў новую кватэру, – гэта спальны гарнітур.

– Аднак паступова кватэру абставілі. Хаця працы ў ёй шмат. Яшчэ трэба  дзе-нідзе паклеіць шпалеры. 

Анастасія прызнаецца, што ў яе ёсць мара – на балконе паставіць толькі ўтульнае, прыгожае крэсла і стол.

– Каб па начах піць каву і глядзець на начны праспект. Ніякіх закатак і лыжаў у маёй кватэры не будзе.