Віляйчанін збіў дзяўчыну-бармэна ў вілейскім бары. Яго чакае суд

Крымінальную справу перадалі ў суд пятага сакавіка. Фігурант і пацярпелая – жыхары Вілейкі.

Бойка здарылася ў вілейскім бары «Дубочак» ноччу 20 студзеня, расказаў карэспандэнту «Рэгіянальнай газеты» намеснік пракурора Вілейскага раёна Андрэй Жукоўскі.

44-гадовы вілейчук выпіў і заснуў на барнай стойцы. Дзяўчына-бармэн пачала яго будзіць.

Калі мужчына прачнуўся, нецэнзурна вылаяўся, стукнуў яе спачатку нагой у грудзі, а потым кулаком у галаву.

Збітай дзяўчыне дапамаглі два наведнікі бара. Яны трымалі крыўдзіцеля, пакуль прыедзе міліцыя.

Па словах Андрэя Жукоўскага, фігурант прызнаў сябе вінаватым. Ён пазнаў сябе ў запісе з камеры відэаназірання. Але тое, што збіў дзяўчыну, не памятаў.

Абвінавачаны раней быў судзімы за забойства з асаблівай жорсткасцю і рабунак. Стаіць на ўліку ў доктара-нарколага.

За хуліганства ў «Дубочку» яму пагражаюць грамадскія работы або штраф ці выпраўленчыя работы на два гады, або арышт, або амежаванне волі да двух гадоў ці пазбаўленне волі да трох гадоў.

• Тэкст даступны на мове: Беларуская